Бұл туралы ҰКП Төралқа төрағасы Райымбек Баталов сауда, агроөнеркәсіптік кешен, сондай-ақ шағын және орта бизнесті дамыту комитеттерінің жиналысында айтып, Ұлттық палатаны трансформациялау жобасын таныстырды.
«Қаңтардағы оқиға бүкіл мемлекеттік жүйені өзгерту қажеттігін көрсетті. «Атамекен» кәсіпкерлер палатасы да шетте қалмады. Біз басымдықты шағын шағын бизнеске ауыстыруды жоспарлап отырмыз. Бұл бағытта «Атамекен» тарихында алғаш рет шағын кәсіпкерлерге Төралқа құрамына кіруге мүмкіндік беру – алғашқы қадам болмақ», – деді Райымбек Баталов.
Ұлттық кәсіпкерлер палатасы туралы заң 2013 жылы қабылданды. Осы уақыт ішінде құжат заман талабы және жаңа технологияларға сай болмай қалды. Ұлттық палатаны ашық, клиентке бағдарланған, демокартиялық ұйымға трансформациялау шеңберінде бес негізгі бағыт бойынша жұмыс істеу тәсілдерін қайта қарау жоспарланған. Атап айтқанда, өңірлік бизнесті, салалық бизнесті қолдау және дамыту, адами капиталды дамыту, ҰКП процестері мен сервистерін цифрландыру, бизнесті қорғаудың экожүйесін құру.
Бизнесті қорғау жеткіліксіз екенін кәсіпкерлердің өзі де көтеріп келеді. «Шопан-ата» Қазақстан қой өсірушілер қауымдастығының төрағасы Алмасбек Садырбаев өңірлерде соңғы отыз жыл ішінде жинақталған заңсыз сот шешімдері мен тексерулердің теріс тәжірибесі бар екенін жеткізді.
«Жұмыс тобы форматында бизнесті нақты қорғау қажет. Егер біз осы шаруамен қазір тығыз айналыспасақ, қаңтар айындағы оқиғалар қайталана ма деген қауіп бар. жергілікті жерлерде мұндай әлеуметтік шиеленісті алып тастау қажет», – деді Алмасбек Садырбаев.
Ұлттық палата бизнесті қорғаудың экожүйесін құру, кәсіпкерлердің проблемаларын анықтау және жою жөніндегі жұмысты көптен бері жүргізіп жатқанын атап өткен жөн. Ол үшін ҰКП, Мемлекеттік органдар, адвокаттық және заңгерлік қоғамдастықтардың өкілдерімен жұмыс топтары құрылды. Олар кәсіпкерлердің қазіргі проблемалары жайында мәліметтерді жинап қана қоймай, шешумен де айналысып жатыр.
4 қарашада «Атамекен» Ұлттық кәсіпкерлер палатасының Съезі өтеді. Онда трансформация жобасы таныстырылады. Трансформация бағытындағы өзгерістер 2025 жылға дейін үш кезеңде іске асырылады.
