«Бізде суармалы жерден кейінгі өзекті мәселе – қойма. Шаруалардың көбі көкөніс өсіреді, ал ол өнімді сақтайтын орын жоқ. Сондықтан биыл «Виктория» және «ЛидерPVL» шаруа қожалықтары 20 мың тонналық қойма салды. «ПавлодарНатурПродукт» ЖШС биыл сурмалы жерді 800 гектарға ұлғайтып, 10 мың тоннаға қойма салды. «Шығыс-Альянс» ЖШС суармалы жерді 210 гектарға ұлғайтты, – деді Ақсу қаласының әкімі Нұрлан Дүйсембинов жиында.
«Америкалықтар келді. Біз оларға жылыжайдың артындағы, индустриялық аймақтағы, Үштерек ауылының маңындағы орындарды көрсеттік. Оларға жақын жерде темір жол болғаны маңызды. Қазіргі уақытта қарастыруда», – деді Нұрлан Дүйсембинов.
Қала басшысы алдағы ұзақ уақыттық жоспарда қант зауыты мен крахмал зауытын салу тұрғанын айтты. Ең бірінші қант зауыты қолға алынады.
Айта кетейік, жыл басынан бері Ақсу қаласында негізгі капиталға инвестициялардың 2,6% өсуі байқалады, ол 60,8 млрд теңгені құрады.
