Облыс әкімі Марат Сұлтанғазиев Іргелі ауылдық округіне қарасты “Асыл арман” тұрғын үй кешенінде салынып жатқан 2000 орындық орта мектепке баса назар аударды, деп жазады kazbusiness.kz тілшісі.
“Адвенто” ЖШС тапсырысы бойынша құрылысы жүріп жатқан жобаның сметалық құны – 5 миллиард 300 миллион теңге. 6,5 гектар жерді алып жатқан мектептің құрылысы жұмыстары 2021 жылдың 1 сәуірінде басталған.
Жоба бойынша мектепте балабақша мен педагогтарға үй салу қажет.
“Бұл кәсіпорын адал мердігерлердің тізімінде қалғысы келсе, нысандарды мерзімінде тапсыру үшін барынша күш салуы қажет”, – деді облыс басшысы.
Одан бөлек облыс әкімі Әйтей ауылдық округіндегі “Өмірұзақ” тұрғын үй кешенінің аумағында объективті сынға ұшыраған мердігер ұйым “Ақ Ордасы Корпорациясы” ЖШС-мен кездесті. Бұл кәсіпорын ауданда үш нысан тұрғызуды жоспарлап отыр.
Айта кетейік, тұрғын үй кешеніндегі 900 орындық мектеп құрылысы да сынға ұшыраған. Өз кезегінде Марат Елеусізұлы кәсіпорынның “адал мердігерлер тізімінде қалғысы келсе”, сын-ескертпелерді ретке келтіруді тапсырды.
