Алматыдан Меккеге үлкен қажылыққа бармақ боп 120 адам ниеттенген. Олар “Zamzam Qazaqstan” компаниясына әрбірі 2 590 000 теңгеден шығарып өткізген. Кеше Мединаға кірейін деп жатқанында Сауд Арабиясының полициясы қамауға алды. Хадж визасының қолдан жасалғаны белгілі болған, деп хабарлайды kazbusiness.kz ақпарат агенттігі.
Бұл туралы ата-анасын үлкен қажылыққа аттандырған Баян Сейтжан баяндады. Айтуынша, “Zamzam Qazaqstan” компаниясы үлкен қажылық ұйымдастыруды қолға алған. Данияр есімді компания басшысына сенім артып, қаражаттарын өткізген. Әр адамнан 2 млн 590 мың теңгеден. Баян болса әке-шешесіне деп екі турды 5 млн 180 мыңға сатып алған.
“Ата-анам кеше Мединаға кіру керек болған. Алайда құжаттары дұрыс болмай полиция ұстап, қамауға алды. Кеше түнімен допрос жүргізді. Елшілік пен Муфтияттың көмек қолын созуының арқасында бүгін қамаудан шығарды”, – дейді Баян.
Айтуынша, хадж визасының жапсырмасын қолдан жасаған. Қажылыққа ниеттенгендердің барлығы 60-80 жас аралығындағы қарт.
“Кеше білдік, әуежайға да барып біліп жатырмыз, таныстар да хабарласып жатыр. Бронь да жоқ, виза да жоқ, тас та жоқ, ештеңге де жоқ. Даниярдың өзі де жоқ. Ол бұрын “Кәусар” деген компанияны басқарғанын біліп жатырмыз. Ол да осылай алаяқтықпен айналысқан компания” – деді ол.
Баян Сейтжанның әділдік пен көмек іздеп қақпаған есігі, бармаған жері жоқ. Прокуратура, ішкі істер департаменті, сыртқы істер министрлігіне дейін шағымданған. Бірақ құзырлы органнан еш мардымды жауап ала алмаған.
Қазіргі уақытта 120 адамның тағдыры не болары әлі белгісіз. Елге кері қайтарылады деп Муфтият пен елшілік қызметкерлері тергеуден шығарып алған. Алайда елге аман-есен оралғандарынша қонатын баратын да, қонатын да жері жоқ. Арабша, ағылшынша бір сөз білместен тосып отыр.
