Қазақстанда “Үздік YouTube арнасы” және “Үздік подкаст” номинациялары бойынша сыйлық беруді жоспарлап отыр. Бұл туралы Ақпарат және қоғамдық даму министрі Дархан Қыдырәлі Қапшағайда өткен І Халықаралық медиа және туризм форумында мәлімдеді, деп хабарлайды kazbusiness.kz ақпарат агенттігі.
Министрдің айтуынша, қыркүйек айында Astana Media Week, New Media форумы және “Үркер” телевизиялық сыйлығын біріктіріп өткізіледі деп күтілуде. Сондай-ақ, “Үркер” сыйлығына екі жаңа номинация қосылады.
“Биыл “Үркер” сыйлығында “Үздік YouTube арнасы” және “Үздік подкаст” сынды екі жаңа аталым қосып отырмыз. Бұл саланың дамуына серпін беріп, түркі әлемін жақындастыра түседі деп санаймыз”, – деді министр.
Сондай-ақ Дархан Қыдырәлі Қазақстандағы креативті индустрияны дамыту үшін бірқатар нақты жұмыстар атқарылып жатқанын айтты.
“Қазір әлемдік медиада пост-шындық кезеңі, жасанды интеллект дәуірі басталғаны бәрімізге белгілі. Президент Қасым-Жомарт Тоқаев ақпарат саласының жаңа дәуір талаптарына сай, жаңа сапаға өтуі керегін атап өткен болатын. ТМД елдері арасында бірінші рет қабылданған “Онлайн платформалар және онлайн жарнама туралы” заң осы қажеттілікті реттеп, олқылықтың орнын толтырады”, – деді министр.
Еске салсақ, алдағы Astana Media Week, New Media форумдары, сондай-ақ “Urker-2023” баспа, радио, интернет журналистика саласындағы ұлттық сыйлығы күзде Астана қаласында өтеді.
