Жуырда Алматы облысы, Қарасай ауданы, Жібек Жолы ауылдық округінде орналасқан Ы.Алтынсарин атындағы орта мектебінде «Әдеп әлемі» атты өзекті әрі мазмұнды кездесу өтті.
Кездесудің мақсаты – мұғалімдерге педагогикалық әдеп қағидаларын білуді және қолданудың маңыздылығын меңгерту. Кездесудің құрметті қонақтары ауданымыздың аты аңызға айналған, дана да білікті басшы, көреген ұстаз Темірқұлова Әсемкүл Құрмашқызы мен білікті ұстаз, физика майталманы, 1990 жылы мектебіміздің алғашқы қазақ сыныптарын ашқан Мұхамедияров Бекен Мұхамедиярұлы болды. Сонымен қатар, өз маманының шебері, ағылшын тілі пәнінің мұғалімі, ұлағатты ұстаз Толысбаева Дәмеш Толысбайқызы да осы ортадан табылды.
Қонақтарымызды Утарова Арманайдың жетекшілігіндегі домбырашылар ансамблі қасиетті күймен қарсы алды. Іс- шараны мектеп директоры Досаева Бағлан Беделбайқызы алғысөзімен ашты. Кездесуде, ұлағатты ұстаздар «Әдеп – білімнен бұрын келеді» – демекші жас мамандар мен мұғалімдерге білім берумен қатар, педагогикалық әдептің бала тәрбиесіндегі рөлі туралы аса құнды білімдерімен, тәжірибелерімен бөлісті. Педагог мәртебесі – педагогикалык әдеп қағидаларымен қатар, еңбектің адалдығымен келетіні жайлы кеңінен сөз болды. Педагогикалық әдеп ең құнды қасиет болып қала беретінін, өздерінің 45 жылдан астам ұстаздық тәжирібелерінде ұстанғандарын мысалдармен келтірді. Сонымен қатар, әлеуметтің жағдайына қарамастан баланың жүрегіне жол табуды ұстану, балалардың мінез-құлқына аса мән беру, мән жайды білмей жатып балаға шүйлікпеу, балаға дауыс көтермеу, әлі толық қалыптаспаған бала үшін аталған талаптар қай кезде де маңызды болып қала беретінін атап өтті. Педагог жемісі – ұзақ, қажырлы еңбекті қажет ететін мамандық болғандықтан, төзімділік деген қасиеттің өзектілігіне де тоқталды. Оның үстіне қазіргі заманауи балалардың алдында мұғалімдер сыйлы болу үшін, өз білімдерін жетілдіріп отыру керек екендігін ескертті. Іс-шара соңында, мұғалімдер өздерін мазалап жүрген сұрақтарын қойып жауаптарын алды. Әсерлі ән шашуын мектебіміздің музыка пәні мұғалімі Тастанбекова Фарида орындады. Айтыскер ақын Тұрсын Шынарбек ұлағатты ұстаздарға тамаша арнауын арнады.
Кездесуден түйгеніміз «Дүниедегі мамандық атаулының төресі – ұстаздық» деген атқа лайық болу үшін педагогикалық әдеп рөлінің орасан екеніне куә болдық. Ғибратты әңгіме мен керемет кездесу жағымды аура қалыптастырды. Қонақтарға алғысымыз шексіз.
Қансұлу Қармысова,
мектептің әдеп кеңесінің төрағасы.
