Қазіргі кезде Қазақстанда бөлшек сауда салығының арнайы салық режимі қызметтің 114 түрін қамтиды. Табыс салығының мөлшерлемесі 3% мөлшерінде белгіленген. Әлеуметтік салық пен ҚҚС төлеуден босатуды көздейтін норма 2023 жылғы 1 қаңтарға дейін қолданылады. Ал 2025 жылғы 31 желтоқсанға дейін арнайы салық режимі тек қоғамдық тамақтануға қатысты қолданылатын болады, табыс салығының мөлшерлемесі 6%-ға дейін өседі, әлеуметтік салық пен ҚҚС төлеуден босату сақталады. Түзетілер 6 арнайы салық режиміне енгізілмек. Ұлттық палата бөлшек сауда салығынан бастауды ұсынды. Ол бойынша Қаржы министрлігі ҰКП-дан бірінші кезекте ұсыныстар күтеді.
«Бөлшек салық – басымдыққа ие төлем. ҚҚС шегі – өте күрделі мәселе екенін ескерсек, бөлшек сауда салығы Қазақстандағы шағын және орта бизнестің дамуына ықпал ету мүмкіндігі. Сондықтан бұл мәселе сыртымыздан емес, біздің пікірімізді ескере отырып шешілсін. Осы режимді қолданатын кәсіпкерлерді ҚҚС төлеуден босату ұсынылады. Сонымен қатар арнайы режимнің қолданылу мерзімін шектеуді алып тастауды қарастыру. Үй жанындағы дүкендер үшін 1% мөлшерінде мөлшерлеме, жеке тұлғаларға тауарлар, жұмыстар мен қызметтер өткізетін кәсіпкерлер үшін айналымнан 3% мөлшерінде мөлшерлеме белгілеуді ұсынамыз. Бірақ, бұл режим жеке тұлғалар, оның ішінде жеке кәсіпкерлерге сату бойынша айналым жалпы айналымның кемінде 90%-ын құраған жағдайда қолданылуы керек. Егер шекті мәннен асып кетсе, онда мөлшерлеме 4%-ға дейін артады», – «Атамекен» ҰКП басқарма төрағасының орынбасары Тимур Жаркенов атап өтті.
Сонымен қатар, жеке кәсіпкерлер үшін арнайы салық режиміне қарамастан, еңбекақыдан 20%, бірақ 4 АЕК-тен кем емес бірыңғай төлемді белгілеу ұсынылды.
«Үй жанындағы дүкендер мәселесі әйтеуір назарға алынды! Біз бұл мәселе бойынша 3, 5 жылға жуық уақыт бойы күресіп келеміз. Сіздерсіз бұл іс алға қозғалмас едік. Ең бастысы, шатасып қалмау үшін санатқа бөлу керек, өйткені уақыт өте келе ҚҚС мәселесіне қайта ораламыз», – деп түсіндірді бөлшек сауда және тамақтану қауымдастығының президенті Марина Бошель.
Акцизделетін тауарларды өндіру; акцизделетін тауарларды сақтау және көтерме саудада өткізу; мұнай өнімдерінің жекелеген түрлерін – бензин, дизель отыны мен мазут өткізу; лотереяларды өткізу; жер қойнауын пайдалану; сақтандыру брокері мен сақтандыру агентінің қаржы, сақтандыру қызметі және делдалдық қызмет айналысатын кәсіпкерлерді қоспағанда, шағын және орта бизнес субъектілеріне арнаулы салық режимін қолдану ұсынылады.
Қоғамдық тамақтану қауымдастығының басшысы Вероника Нұрпейісованың пікірінше, әрбір салық, оның ішінде бөлшек сауда салығында олқы тұстары көп, оларды Ұлттық палатаның ресурстарын барынша пайдалана отырып, дәл анықтап, жақсартуға мүмкіндік бар.
