Сондай-ақ, қазақ әйелдері еліміздегі барлық жұмыспен қамтылғандардың 48,1 %-ын және жұмыс істейтіндердің 48,9 %-ын құрайды, деп хабарлады ranking.kz.
Жеке кәсіпкерлікте әйелдердің де рөлі зор. Басшылары әйелдер болып тіркелген жеке кәсіпкерлердің саны бір жылда 9,1%-ға өсіп, 2021 жылдың соңына қарай 625,1 мыңға жетті. Олардың жеке кәсіпкерлердің жалпы санындағы үлесі де – жылына 47,4%-дан 49%-ға дейін өсті.
Жас қыз-келіншектер жеке кәсіпкерлікте де белсенділік танытуда. Атап айтқанда, жетекшілері 29 жасқа дейінгі әйелдер болып табылатын белсенді жеке кәсіпкерлердің саны бір жылда 37,2%-ға өсіп, 88,7 мыңға жетті. Белсенді жас кәсіпкерлердің жалпы санындағы әйелдердің үлесі 43,4-тен 46,4 %-ға дейін өсті.
Шағын және орта бизнес туралы айтатын болсақ, мұнда да әйелдердің үлесі зор. Осылайша, қыз-келіншектер басқаратын ШОБ субъектілерінде жұмыспен қамтылғандар саны 2021 жылдың басына қарай 1,1 млн адамды құрады, бұл – жалпы санның 31,1%.
Жалпы, әйелдер кәсіпкерлігінің Қазақстан Республикасының жалпы ішкі өніміне қосқан үлесі 40 % шамасында.
