Келесі жылы жұмыс берушілердің міндетті зейнетақы жарналары енгізіледі. Бұл туралы еңбек және халықты әлеуметтік қорғау министрі Тамара Дүйсенова мәлімдеді, деп хабарлайды kazbusiness.kz сайтына Sputnik Қазақстан-ға сілтеме жасап.
“2024 жылдан бастап жас салымшыларды зейнетақымен қамсыздандырудың шартты-жинақтаушы жүйесін қалыптастыру үшін жұмыс берушілердің міндетті зейнетақы жарналары енгізіледі”, – деді Дүйсенова еңбек министрлігінің кеңейтілген алқа отырысында.
Сондай-ақ, министрдің айтуынша, жүйеге қатысу өтіліне байланысты зейнетақы және сақтандыру төлемдерінің мөлшерін кезең-кезеңімен ұлғайту жалғасады.
“Биыл қабылданған зейнетақы жүйесіне енгізілген өзгерістер азаматтарға бұрынғы табысының кемінде 40% мөлшерінде зейнетақымен қамтамасыз етуге мүмкіндік береді. Өсім ең алдымен базалық зейнетақының ең төменгі мөлшерін алатын зейнеткерлерден басталады. 2023 жылы зейнеткерлердің осы санаты үшін тек базалық зейнетақы мөлшері 21%-ке дейін көтерілді. Кезең-кезеңмен өсу 5 жыл ішінде, яғни 2023 жылдан 2027 жылға дейін жүргізіледі, бұл былтырғы инфляцияны және оның кейінгі жылдарға арналған болжамды дәлізін жабуға мүмкіндік береді”, – деді ол.
Айтуынша, дәл осындай жұмыс әлеуметтік сақтандыру жүйесінде жүргізіледі. Биыл жұмысынан айырылуына байланысты берілетін әлеуметтік төлемдер мөлшері жоғалтқан табыстың 45%-іне дейін жеткізіледі.
Бұдан бөлек, жинақтаушы зейнетақы жүйесінің тиімділігін арттыру мақсатында салымшыларға өз зейнетақы жинағының 50%-ін жеке басқаруға беру құқығы қарастырылады.
