Экс-мәдениет және спорт министрі Арыстанбек Мұхамедиұлының адвокаты Мұстахим Төлеев пара беруге итермеледі деген күдікпен ұсталды, деп хабарлайды kazbusiness.kz.
Сыбайлас жемқорлыққа қарсы қызмет тергеп жатқан қылмыстық істер төңірегінде аса ауыр жемқорлық қылмыстар жасалынғанын анықтады.
“Жасырын іс-шаралар кешенінің нәтижелері бойынша пара беруге оқталған бұрынғы мәдениет және спорт министрі Арыстанбек Мұхамедиұлының жұбайы әшкереленді. Cондай-ақ министрдің мүддесін қорғаған адвокат алаяқтық пен пара беруге итермелеу күдігімен ұсталды”, – деп хабарлады ведомство.
Арыстанбек Мұхамедиұлының қылмыстық жазасын жеңілдету және қамаудан босату сылтауымен оның жұбайынан адвокат 460 000 АҚШ доллары сомасында ақшалай қаражат алған. Ол қаражатты сот органдарының лауазымды адамдарына бермек болған.
“Тергеу кезінде 255 000 АҚШ доллары көлеміндегі қаражат анықталып, тәркіленді. Қалған соманы ол өз қалауы бойынша жұмсаған. Экс-министрдің өкілі ұсталып, уақытша ұстау изоляторына қамалды”, – деп атап өтті агенттік.
Ал Мұхамедиұлының жұбайы аса ірі көлемде пара беруге оқталды деген күдікке ілінді.
