Шымкент полицейлері екі жыл бұрын орын алған кісі өліміне қатысты қылмыстың бетін ашты, деп хабарлайды kazbusiness.kz ақпарат агенттігі Polisia.kz-ке сілтеме жасап.
Ведомство мәліментінше, 2021 жылы Енбекші аудандық полиция басқармасына өзінің 32 жастағы ұлының жоғалып кеткені туралы жергілікті тұрғын шағымданған.
Шағымданушының айтуынша, ер адам үйден екі жеті бұрын кетіп, сол күйі оралмаған.
Жоғалған адамның қайда кеткенін анықтау үшін криминалдық полиция қызметкерлері кешенді іс-шаралар жүргізді.
Тәртіп сақшылары оның отбасы мүшелерін, көршілерін, достарынан сұрастырды. Одан бөлек баруы мүмкін деген жерлерде орналасқан бейнежазбаларды тексерді.
Ер адамның сыртқы келбетін сипаттайтын бағдарлар қалалық полиция департаментінің барлық бөлімшелеріне, сондай-ақ елдің барлық аймақтарының полиция бөлімдеріне жіберілді.
“2 жыл бойы іздеулер нәтиже бермеді. Алайда осы жылдың басында жедел қызметкерлер жаңа ақпарат тапты. Кездейсоқ куәгердің сөзіне сәйкес, ер адамның жоғалуына інісінің қатысы бар”, – делінген хабарламада.
Қабылданған шаралар нәтижесінде отбасылық жанжал барысында ол туысын басынан арматурамен бірнеше рет ұрып, өлтіргені анықталды. Бұл іске ол өгей ағасының мас күйінде анасымен жанжалдасатыны итермелеген. Аса ауыр қылмыстың ізін жасыру үшін қаскүнем мәйітті сырттағы дәретханаға тастап, шұңқырды бетонмен толтырып, үстіне шағын сарай тұрғызған.
Күдікті қамауға алынды. Еңбекші АПБ-ның тергеушілері қылмыстық істі айыптау актісімен сотқа жолдады.
