2023 жылдың басынан бері шетелдіктердің туристік жарналардан әкімдіктердің бюджеттеріне 314 миллион теңге түсті. Түсімдер бойынша көшбасшы – Алматы қаласы. Оңтүстік мегаполиске жалпы соманың 86% немесе 270,6 млн теңге тиесілі. Екінші орында 37,7 млн теңгеден астам туристік жарна жинаған Астана, деп хабарлайды kazbusiness.kz тілшісі мәдениет және спорт министрлігінің баспасөз қызметіне сілтеме жасап.
Туристік жарналарды төлеу тәжірибесі әлемнің 50-ден астам елінде бар екенін ескерсек, шетелдік туристер үшін бұл шара үйреншікті болып табылады. Туристік жарна – бұл жатақхана, жалға берілетін тұрғын үйден бөлек орналасқан жерлер үшін туристерден алынатын төлем.
Туристік жарнаның мөлшерін әкімдіктер белгілейді. Қаражат жергілікті атқарушы органдардың бюджеттеріне де түседі.
“Туристік жарнадан түскен қаражат туристік инфрақұрылымды дамытуға, аумақтарды абаттандыруға, туристік мүмкіндіктерді ілгерілету жөніндегі іс-шараларды іске асыруға бағытталуы тиіс. Бұл өңірлерге келетін туристер санының артуына түрткі болады”, – деп атап өтті ҚР МСМ Туризм индустриясы комитетінің төрағасы Дастан Рыспеков.
