Сыбайлас жемқорлыққа қарсы қызмет 2021 жылы қылмыстық істі тоқтату сылтауымен алдау арқылы 40 миллион теңгені иеленген полиция генерал-майоры Берік Біләловқа қатысты тергеуді аяқтады, деп хабарлайды Kazbusiness.kz.
Сыбайлас жемқорлыққа қарсы қызмет Telegram-дағы ресми арнасында полиция генерал-майоры Берік Біләловке қатысты іс бойынша тергеу аяқталғанын хабарлады.
“Қазіргі уақытта іс айыптау актісін бекіту үшін прокуратураға жіберілді. Қылмыстық процестік кодекстің 201-бабына сәйкес тергеу мүддесі үшін өзге ақпарат жария етуге жатпайды”, – дейді Сыбайлас жемқорлыққа қарсы іс-қимыл агенттігінің ресми өкілі Арман Тлеукенов.
Агенттік Конституцияның 77 бабы 3-тармағының 1-тармақшасына және Қылмыстық процестік кодекстің 19-бабы 1-бөлігіне сәйкес, адам заңды күшіне енген сот үкімімен қылмыстық құқық бұзушылық жасады деп танылмайынша, ол жасалған қылмысқа кінәлі емес деп есептелетінін атап өтті.
Айта кетейік, генерал-майор Берік Біләлов биылғы ақпанның соңында ұсталды. 59 жастағы Біләлов СҚО ҚАЖД басшысының міндетін атқарушы болып тағайындалғанға дейін, яғни 2014 жылдан 2019 жылға дейін СҚО Полиция департаментінің бастығы, ал 2019 жылы сәуірден қазанға дейін Ақмола облысы полиция департаментінің бастығы болды.
