Алматы облысында аудандық білім бөлімінің есепшісі өзіне қол жұмсады. Бұл ақпаратты өңірлік Полиция департаменті растады, деп хабарлайды kazbusiness.kz ақпарат агенттігі.
Тәртіп сақшыларының айтуынша, 43 жастағы әйел асылып, өзіне қол жұмсағаны туралы хабарлама түскен. Марқұм Жамбыл аудандық білім бөлімінің қызметкері болып шықты. Оның қайтыс болғаны туралы 7 маусымда белгілі болған.
“Аудандық полиция бөліміне 43 жастағы әйел асылып, өзіне қол жұмсағаны туралы хабарлама түсті”, – деп түсіндірді ведомство.
Аталған дерек Қылмыстық кодекстің 105-бабы 1-бөлігі бойынша тіркелді. Қазіргі уақытта қажетті сараптамалар тағайындалып, жедел-іздестіру шаралары жүргізіліп жатыр, деп қосты полицейлер.
Бұған дейін Қарат өзенінен Талдықорған білім бөлімінің басшысы Роза Барманованың денесі табылғаны хабарланған еді. Полицияда әйел адамның денесі табылғаны расталды. Әйтсе де, құқық қорғаушылар мәйіттің қалалық әкімдік қызметкері екенін растамады. Десе де, табылған жанның аты-жөні мен тегі Талдықорған қаласы білім бөлімі басшысының аты-жөнімен сәйкес келеді.
Еске салсақ, Талдықорған қаласы білім бөлімінің қызметкерлерінің пара алғандығы белгілі болған. Олар білім саласында қызмет етпейтін жандардың есепшотына ақша аударып, бірнеше жыл көлемінде бюждет қаражатын жымқырып келген. Алдын ала тигізген зиян шамамен 2 млдр теңгені құрайды. 2022 жылдың желтоқсанында күдіктілер Талдықорған мектептері арқылы 750 миллион теңгені жымқырып үлгерген.
