Алматы облысы Алматы – Байсерке –Талғар газ құбырының екінші желісінің құрылысы басталады. ЖЭО-2 және ЖЭО-3-ті газбен қамтамасыз ету үшін Қарасай ауданында 612 жер телімін сатып алу қажет, деп хабарлайды kazbusiness.kz тілшісі.
Алматы облысы әкімдігінің мәліметінше, Алматы – Байсерке – Талғар газ құбырының бірінші желісінің құрылысы 2014 жылы аяқталған. Қазір Алматы қаласында орналасқан ЖЭО-2 және ЖЭО-3-ті газбен қамтамасыз ету үшін екінші желіні тарту қажет. Қарасай ауданындағы «Алматы – Байсерке – Талғар» магистральды газ құбырының ұзындығы – 16 шақырым. Ол Іргелі, Елтай ауылдық округтерінде орналасқан. Жобаға сәйкес газ қысымы 3,5 МПа-дан 5,4 МПа-ға дейін көтеріледі. Осыған байланысты қауіпсіздік аймағын арттыру қажет. Жоғарыда аталған газ құбырының қауіпсіздік аймағына дайындалған жер учаскелерінің картографиялық құжаттары мен экспликациясына сәйкес 700 жер учаскесі бар. Оның 569-ы бос жер болса, 131-де ғимарат орналасқан, оның ішінде 61 тұрғын үй бар. Яғни, олар сатып алуға және бұзуға жатады.
«Қарасай ауданы әкімінің «Жер учаскелерін мемлекет мұқтажы үшін, оның ішінде сатып алу тәртібімен мәжбүрлеп иеліктен шығару туралы» қаулысына сәйкес, екінші кезеңде 569 жер учаскесінің 481-і сатып алынуы тиіс. Иеліктен шығарудың болжамды құны – 3,2 млрд теңге. Шаруа қожалығын жүргізуге арналған 88 жер учаскесі сатып алуға жатпайды және нысаналы мақсаты бойынша пайдаланылуы мүмкін. Қазір тиісті жұмыстарды жүргізіп жатырмыз. Бүгінде ауыл шаруашылығы және жер қатынастары бөлімі Алматы облысының жер қатынастары басқармасына өтеуге қаражат бөлу үшін бюджеттік өтінім дайындады», – деп атап өтті Алматы облысының әкімі Марат Сұлтанғазиев Көкөзек ауылының тұрғындарымен кездесуінде. Сондай-ақ 2,4 млрд теңгеге жер телімдері бар 131ғимаратқа бағалау жүргізілді. 569 бос жер телімін бағалау 10 шілдеге дейін аяқталады. Жер учаскесінің иелеріне хабарланды. Сонымен қатар оларға бос жатқан жер телімдерін айырбастау үшін Исаев, Береке, Ақсеңгір ауылдарынан баламалы жер телімдері ұсынылды.
Сондай-ақ жиында облыс әкімі Қарасай ауданы әкімдігінің аппаратына субсидиялау бағдарламасы бойынша жалға берілетін тұрғын үйге 50 пайыз өтемақы төлеу мәселесін қарауды тапсырды.
