Алматыда 2017 жылдың қыркүйек айфнда қолданысқа берілген тұрғын үй кешені қирағалы тұр. Көп қабатты тұрғын үй мемлекеттік бағдарлама негізінде салынып, қолданысқа берілді. Алайда көптеген ақаулардан үй жаңа емес, ескі кейіпке енген. Бірінші жауыннан кейін пәтердің барлық ақаулары көріне бастаған, деп шағымдануда “Жандосов” тұрғын үй кешенінің тұрғындары.
“Хабар 24” хабарлауынша, “Пласт” АГС құрылыс компаниясы жоба бойынша төрт қабатты гидроизоляция жүргізуі керек еді, бірақ олай істемеген. Нәтижесінде тұрғын үй кешенінің жертөлелері үнемі суға толады.
“Жаңбыр жауған кезде жертөледе шамамен 10-20 см су жиналады. Содан кейін “Хаус мастерс” қызметкерлері жиналған суды арнайы сорғымен сорады. Тұраққа қатысты да мәселелер бар”, – дейді мүлік иелерінің бірлестігінің жетекшісі Марат Исин.
Басқарушы компанияның бас менеджері Михаил Поповтың айтуынша, аула сыпырушысы жасыл желекті суарғанның өзінен жертөлеге су жиналатын көрінеді.
Тұрғын үй кешенінің тұрғындары ылғалдың ғимараттың беріктігі мен қауіпсіздігіне нұқсан келтіреді, дейді. Онымен қоймай саңырауқұлақтар мен зең денсаулыққа өз әсерін тигізбей қоймайды.
“Осы жолы жеделсаты шахтасын су басты. Төрт күн бойы үлкен жеделсатыны қолдана алмай келеміз. Адамдарды тоқ соғатындықтан, оны әлі қоса алмауда”, – деген кешен тұрғыны Любовь Вакулина алаңдаушылығын жеткізді.
Тұрақты су тасқынына шағымданған тұрғындар Алматы әкімдігінің күрделі құрылыс кәсіпорнына жүгінді. Себебі ведомство – жобаның тапсырыс берушісі әрі тұрғын үйлерді пайдалануға қабылдаған мекеме. Өз кезегінде мемлекеттік орган құрылыс салушының құрылыс ақауларына көз жеткізіп, оны сотқа берді.
“Бізде бас мердігер “Пласт” АГС және бас жобалаушы “АлматыГипрогор” ЖШС қатысты шағымдар болды. Осыдан кейін біз сотқа жүгіндік. Бірақ сот шешімімен барлық тармақтар бойынша бас тартылды. Осылайша біз бұл соттан ұтылдық”, – деді Алматы әкімдігі күрделі құрылыс кәсіпорнының бас инженері Бауыржан Төлеғұлов.
Айта кетейік, тұрғындар болса мемлекеттік комиссияның бұл үйлерді қалай қабылдағанына таңданысын жасырмады.
