Қазақстан Республикасының Президенті Қасым-Жомарт Тоқаев пен ҚР Үкіметінің әлеуметтік маңызы бар тауарлар бағасын төмендету және тұрақтандыру, сондай-ақ, Қазақстан мен ҚХР арасындағы екіжақты экономикалық қарым-қатынасты нығайту туралы тапсырмасының негізінде “Алтын-Орда” сауда-логистикалық орталығы басшылығының бастамасымен сауда-саттық, инвестиция және логистиканы дамыту бойынша серіктестік орнатуға бағытталған бірқатар құжаттар әзірленіп, қол қоюға дайындалуда, деп хабарлайды kazbusiness.kz.
Атап айтқанда, “Алтын-Орда” сауда-логистикалық орталығының Бас директоры Әлпиев Данияр Алтынбекұлының Қытай Халық Республикасына сапары барысында аспан асты елінде өндірілетін күнделікті тұрмысқа қажетті өнімдер мен ауыл шаруашылығы тауарларын биылғы және алдағы жылдары тікелей жеткізу бойынша алдын ала келісімге келді.
Қазіргі уақытта әлемдегі саяси және экономикалық процестердің турбуленттілігін, рекордтық инфляция мен әлемдік экономиканың Орталық Азия аумағында да, Қазақстанда да тұралауын, соның салдарынан логистикалық байланыстардың үзілуін ескере отырып, ең қажетті тауарлар мен азық-түліктің бағасын төмендету және тұрақтандыру жұмыстары әлеуметтік шиеленісті шешудің ең тиімді жолы екендігі анық. 2023 жылы Қазақстанда азық-түлік бағасы соңғы 15 жылда болмаған көрсеткішке жетті. Осы жылдың ақпан айында инфляция 21,3 пайызды құрады.
Осыған орай, “Алтын-Орда” СЛО аталған мәселені бір жолға қою үшін кризис-менеджмент стратегиясын қолдану арқылы делдалдарды, яғни өндіруші мен тұтынушылар арасындағы алып-сатарлардың әрекетін тоқтату туралы шешім қабылдады.
Қазіргі кезде “Алтын-Орда” СЛО басшылығы Қытай тарапының қолдауынан кейін Қытай тауарларының ассортиментін зерттеп, алдын ала талдап, осы және алдағы кезеңдердегі сату көлемі мен нақты мерзімін жоспарлауда.
Тұрғындардың қажеттілігін қанағаттандыру мақсатында нақты нарықтық экономикаға көшу – мемлекетіміздің дамуындағы күрделі де маңызды кезең екенін бәріміз білеміз және түсінеміз. Сонымен қатар, осы күрделі кезеңдегі міндетімізге жауапкершілікпен қараймыз.
Қазіргі таңда “Алтын-Орда” сауда-логистикалық орталығы мемлекеттік қолдаудың арқасында халық тұтынатын негізгі тауарларды шығаратын қытайлық өндірушілермен тиімді келісімге келіп, бірқатар коммерциялық келісімшарттарға қол қоюға мүмкіндік алды.
Қытай Халық Республикасына сапар мен Бейжіңдегі 250 гектарға жуық аумақты алып жатқан ең ірі “Xinfadi” (Синьфади) азық-түлік көтерме базарын аралау барысында “Алтын-Орда” СЛО бас директоры Әлпиев Данияр Алтынбекұлы мен базардың бас директорының атқарушы орынбасары Гу Чжаосуэ кездесті.
Екі тарап негізгі тақырыптарды талқылау кезінде басқару, жаңа логистикалық технологияларды енгізу, көлік инфрақұрылымының тиімділігін арттыру мәселелерін де назардан тыс қалдырмады. Қытай тарапы Қазақстан Республикасының әлеуметтік маңызы бар тауарлар бағасын реттеу саясатына оң баға берді.
