Кеше АҚШ-тың 45-ші Президенті Дональд Трамп айып тағылғанға дейін қамауға алынғаны туралы CNN мәлімдеді, деп хабарлайды kazbusiness.kz.
Трамп кеше өз еркімен Манхэттеннің аудандық прокурорының кеңсесіне келген. Онда америкалық заң процедурасына сәйкес, оны айыптау үшін сотқа дейін қамауға алынды. Айта кеткен жөн, Трамп АҚШ-тың бұрынғы Президенті ретінде бірыңғай құқық қорғау органдарының қорғауында болғандықтан, қолына кісен салынбады. Бірақ оның саусақ іздері алынған.
Трамп қамауға алынар алдында өзінің Truth Social әлеуметтік желісінде бұл іске пікір білдіріп те үлгерген:
“Мен төменгі Манхэттендегі сот ғимаратына бара жатырмын. Бұның бәрі шын емес секілді, олар мені тұтқындағалы жатыр. Бұл Америкада болып жатқанына сене алмаймын. MEGA! [Make America Great Again]”, – деп жазды ол.
CNN хабарлауынша, Дональд Трамп сот ғимаратына барған соң, Манхэттен соты АҚШ-тың бұрынғы Президентін ресми қамаудан әзірге босатқан. Ал Трамптың адвокаты АҚШ-тың экс-Президентіне тағылған айыптар негізсіз екенін мәлімдеді.
Сондай-ақ CBS News телеарнасының мәліметінше, Манхэттен сот залында Дональд Трамп өзіне тағылған 34 айып бойынша кінәсіз екенін жариялаған.
“Бұрынғы Президент Дональд Трамп іскерлік құжаттарды бұрмалағаны үшін 34 айып бойынша кінәсін мойындамады”, — деп хабарлайды телеарна.
Трампқа қандай айып тағылған?
Трампқа қасақана жалған қаржылық құжаттама жасау ісі бойынша айып тағылған. 2016 жылғы президенттік сайлауға дейін Трамптың бұрынғы адвокаты Майкл Коэн актриса Сторми Дэниэлске үнсіздік үшін 130 мың доллар ақша берген. Трамп пен Дэниэлс 2006 жылдан бастап 4 жыл көңілдес болған.
Президеттік сайлау алдында өз репутациясын құртпас үшін Трамп актрисамен жария етпеу туралы келісім жасаған. Бірақ оқиға 2018 жылы ашылады. Дэниэлс “In touch Weekly” журналында сұхбат беріп, онда бұрыңғы АҚШ Президентімен қарым-қатынасы туралы айтып берген.
Заң жүзінде Трампның Дэниэлске үнсіздік үшін ақша беруі қылмыс емес. Алайда айыптаушы тарап Трамптың өз адвокатына берген (ары қарай Дэнилске төлеу үшін) 130 мың долларды Trumpgganization бюджетінен “заңдық қызметтер” үшін деп көрсеткеніне сенімді. Егер сот кезінде жалған құжат Трамптың өзге қылмысын жасыру үшін жасағаны дәлелденсе, ол 4 жыл бас бостандығынан айырылу мүмкін.
Бұрын Америкада Президенттің тұтқындалуы болған ба?
150 жылдан астам уақыт бұрын АҚШ Президентін тұтқындау фактісі болған. 1872 жылы Вашингтонда полиция қызметкері АҚШ-тың сол кездегі Президенті Улисс Гранттың жылдамдығын асырғаны үшін қамауға алған. Грант қала ішінде ат арбамен қатты жылдамдықта шауып жүрген. Полиция қызметкері оны екі рет тоқтатып, алдымен ескерту жасады. Бірақ Грант полицияға тағы да ұсталған. Содан кейін Президентті тәртіп сақшысы қамауға алып, учаскеге апарған. Улисс Грант сол күні жиырма доллар көлемінде кепіле ақша беріп, қамаудан шыққан.
