Алдағы уақытта өңірде ірімшік шығаратын зауыт және тауарлы сүт фермалары іске қосылатын болады. Бүгінде аталмыш жобаларды жүзеге асыру үшін жұмыс қыза түскен. Игілікті іске Қызылағаш ауылындағы «Агрохолдинг Ақсу» ЖШС басшылығы білек сыбана кіріскен. Олар өткен жылдың өзінде-ақ, осы бағыттағы жұмысты бастап кеткен. 1300 басқа лайықталған тауарлы сүт фермасын салуға кірісіп, сонау Дания мемлекетінен 600-ден астам ірі қараны әкелген. Тіптен, жергілікті жұмысшыларға арнап 80 тұрғын үй салуды көздеп отыр. Серіктестік иесі ферма мен зауыттың іске қосылуы үшін 5 млрд теңге инвестиция құйған.
Бұл бастаманы Жетісу облысының әкімі Бейбіт Исабаевта қолдап отыр. Аймақ басшысы тұрғын үйге қажетті инженерлік-инфрақұрылым тартылуына көмек көрсетуді аудан әкімдігіне тапсырды. Ең бастысы жергілікті азаматтарды жұмыспен қамтуға көп көңіл бөлу керектігін еске салды.
Сондай-ақ өңіріндегі тағы бір жақсы жоба – «Ақсу ГЭС» ЖШС-ның форель шаруашылығының құлашы кеңге жайылмақ. Серіктестіктің балық шаруашылығымен айналысуды былтыр бастаған. Жоба бойынша мұнда 170 тонна тауарлы балық өндірілетін болады. Кәсіпкер іске 515 млн. теңге жеке қаражатын салған. Қазіргі кезде инкубациялық цехтың құрылысы біткен, оған екі инкубациялық аппарат сатып алыныпты. Электр желісі тарылған. Кәсіпорын қазір тоңазытқыш құрылғыларын Панфилов ауданында орнатқан, тауар сол жерден алғашқы өңдеуден өткізіліп, экспортқа жөнелтілетін болады.
