36 жастағы ақтөбелік азамат қарбыз егіп, бір жылда 25 млн теңге табыс тапты. Бес баланың әкесі биыл егістік көлемін үш есеге үлкейту жұмыстарын бастап кетті, деп хабарлайды kazbusiness.kz тілшісі.
Жәнібек Елтезеров Ақтөбе облысы Темір ауданы Шұбарқұдық ауылының тумасы. Үш жылдан бері жер жыртып, бау-бақшамен айналысады. Осыған дейін темір жол саласында машинист болып еңбек еткен азамат диханшылықты картоп егуден бастаған.
“Ауылда тұрған соң картоп егуді қолға алдым. Жақсы өнім берді. Келесі жылы аумағын үлкейтіп, сегіз гектар жерге қарбыз ектім. Биыл оны үш есеге көбейттім. Пайда бар. Өткен жылы осы қарбыздың өзінен 25 млн теңге табыс таптым. 10 млн теңгені өсіруге салдым. Жаман емес. Еңбек етсең, несібеңді аласың. Өзімнің екі дипломым бар. Осыған дейін теміржолшы болып еңбек еттім. Машинист мамандығымен тепловоз жүргіздім. Қазір шаруашылықты таңдадым”, – дейді Шұбарқұдық ауылының тұрғыны.
Ісі өрге басқан көпбалалы әке кәсіби бағбанға айналып отыр. Тәжірибелі шаруалардан жер баптаудың қыр-сырын үйреніп, қарбыздың ерте пісетін сұрпын да зерттеп үлгерген. Қазір пленка астына дақыл салып, өнімін нарыққа ерте шығаруды жоспарлап отыр.
