Күні кеше БАҚ беттерінде Алматыда полиция қызметкері әріптесін абайсызда өлтіріп алғаны туралы жаңалықтар тарады. Оқиғаның мән-жайымен Алматы қалалық полиция департаментінің баспасөз хаьшысы Салтанат Әзірбек бөлісті, деп хабарлайды kazbusiness.kz ақпарат агенттігі.
Ауыр жарақат алған 28 жастағы сержант оқиға орнында жан тапсырды. Полицияның мәліметінше, тәртіп сақшысы қызметтесін абайсызда өлтіріп алған.
Еске салсақ, қос сержант полиция ғимаратының бақылау-өткізу бекетінде жұмыс істеген. Куәгердің айтуынша, тәртіп сақшылары арасында кикілжің болмаған. Таңғы сағат жеті шамасында екеуі ас ішетін бөлмеде әңгімелесіп отырыпты. Сол уақытта біреуі қызмет қаруымен байқаусызда жанында отырған әріптесін атып өлтірген.
“Алматы полиция департаменті бүгін полиция қызметкері қызмет қарумен өз әріптесіне оқ атқанын, ол алған жарақат салдарынан қайтыс болғанын хабарлайды. Аталған дерек ҚР ҚК 104-бабымен сотқа дейінгі тергеудің біріңғай тізіміне тіркелді. Тиісті сараптамалар тағайындалды”, – деді Алматы ПД ресми өкілі Салтанат Әзірбек.
Қазіргі уақытта оқиғаға қатысты «Абайсызда адам өлтіру» бабымен қылмыстық іс қозғалып, тергеу жүргізіліп жатыр. Сот-медициналық сараптама да тағайындалды.
Айта кетейік, ҚР ҚК 104-бабында үш жылға дейiнгi мерзiмге бас бостандығын айыру немесе шектеу жазасы қарастырылған.
