Елордада өтіп жатқан бауырлас қалалар форумына 13 мемлекеттен 17 муниципалитет басшылары қатысып жатыр, деп хабарлайды kazbusiness.kz.
«Қазақ халқы әрдайым өзінің қонақжайлығымен ерекшеленген. Еліміздің астанасы, елордамыз –Астана қаласына қош келдіңіздер. Астана қаласы әлем астаналары мен муниципалитет басшыларын қабылдап отыр. Бүгінгі форум ерекше себеппен өтуде –Астана қаласының 25 жылдығы. Бауырлас қалалар форумы, әлемдік қалалар қатарында дамып келе жатқан елордамыз үшін аса маңызды. Әлемнің 13 мемлекетінен 17 муниципалитет басшыларының осы форумға қатысуы –біз үшін үлкен мәртебе. Әрқайсыларыңыздың қатысуыңызды біз жоғары бағалаймыз», – деді Жеңіс Қасымбек елордада өтіп жатқан Астананың бауырлас қалалар форумында.
Елорда әкімінің айтуынша, бүгінгі форум өзара ынтымақтастықты дамытып, дамудың жаңа моделін қалыптастырады.
«Астана қаласы – Қазақстанның маңызды жобаларының бірі. Алғаш рет ХХ ғасырдың соңында қаланып, ғасырлар тоғысындағы шекарадан өтіп, біздің астанамыз әлемдік танымалдылыққа ие болды және бүгінде дамыған экономикасы мен инфрақұрылымы бар заманауи мегаполиске айналды. 25 жылда қаланың жалпы өнімі 22 миллиард долларға, яғни 10 триллион теңгеге дейін, ал өнеркәсіп 4,3 миллиард долларға жетті 2 триллион теңгеге дейін артты», – деді қала басшысы.
Ж.Қасымбектің дерегінше, соңғы жылдары Астанаға 14 миллиард доллардан астам тікелей шетелдік инвестиция тартылды.
