Мемлекеттік “Бастау бизнес” жобасы азаматтарға жеке ісін бастауда көмек көрсетіп, жоспарды іске асыруда 12 айға дейін қолдау білдіреді, деп хабарлайды Kazbusiness.kz сайты.
Аталған жоба бойынша білім алған азаматтар 3 жылға жарамды арнайы сертификат алады. Оқудың жалпы ұзақтығы 25 күнтізбелік күннен аспайды. Үміткердің өтінімі 10 күн ішінде қаралады.
Ал грантқа:
- жұмыссыздар;
- жеке кәсіпкерлер;
- жеке қосалқы шаруашылықпен шұғылданған тұлғалар да үміткер атанады.
Грант мөлшері 400 АЕК-ке тең.
“Бастау бизнес” ұсынған грант үміткері атану үшін төменгі санаттардан болуы міндетті:
- Жастар (29 жасқа дейін),
- Аз қамтылған отбасы мүшелері – атаулы әлеуметтік көмек алушылар;
- Көпбалалы отбасылар – көпбалалы отбасылар бойынша жәрдемақы алушылар;
- Қандастар, қоныс аударғандар;
- Мүгедектігі бар адамдар;
- Мүгедек баланы (мүгедек балаларды) тәрбиелеп отырған тұлғалар үшін.
Айта кетерлігі, грант қаражатын тек “Бастау Бизнес” аясында әзірленген бизнес жоспарды іске асыруда ғана қолдануға болады. Сонымен қатар үміткердің жұмыспен қамту бойынша өзге қолдау шараларына қатыспау керегін ескерген жөн.
Еске сала кетейік, 2022 жылы “Бастау бизнес” жобасы онлайн форматта өтеді. Өтінімдерді қабылдау мерзімі аяқталған соң аудандық және қалалық комиссия қарауына өтеді. Бұдан кейін үміткер өз жобасын комиссия алдында қорғайды. Өтінішті Business.Enbek порталы арқылы бере аласыз.
