Майлы дақылдары арқылы нарыққа шығып, қамбасын қампитып, қазынаны толтырып отырған «МарЭль» шаруа қожалығы дәл осы БҚО –ға қарасты Бәйтерек ауданы, Мичурин ауылдық округінде орналасқан. 2,2 мың гектар мақсары, 6 мың гектарға күнбағыс еккен қожалық қарайған халықтың жан бағуына ықпал етіп қана қоймай, аймақтың экономикалық өрлеуіне үлес қосып отырған жайы бар. Облыстағы ірі қожалықтардың біріне өңір басшысы Ғали Есқалиев арнайы ат басын бұрып, жұмыс барысымен танысты.
Нарықтағы бағасы жағынан дақылдардың алдын орайтын мақсарыны жинауға батыстық диқандар енді кіріскен. Арам шөпке дес бермейтін бұл дақылдың өнімділігі де жақсы. Өткен жылы гектарынан 6-8 центнерден алса, биыл алғашқы күннен-ақ, егін адамдарының еңбегі жанып гектранынан 18 центнерге дейін өнімге кенелген жайы бар. Түркия мен Қытай сынды көршілес мемлекеттердің мақсарыға деген қызығушылығы жоғары, осы жылы да қос көрші елден тағы да сұраныс түседі деп күтілуде.
«Былтыр жыл соңында өнімнің әр тоннасы 200 мың теңгеден саудаланған еді. Биылғы баға да сол маңды межелейді деген болжам бар. Өнімді сақтап барып сатқан тиімді. Мақсарының бағасы қысқа қарай көтеріледі»,-дейді « МарЭль» шаруа қожалығының жетекшісі Марат Асанов.
Қожалықта өздеріне тиесілі арнайы қойма бар. Мұнда 10 мың тонна дақыл емін-еркін сияды. Бұл дақылдан алынатын майдың сапасы жоғары, осыны ескерген аймақ басшылығы алдағы таңда мақсары майын шығаруға бас мән беруді көздеп отыр.
«Облыс бойынша мақсары алқабының көлемі артып келеді. Былтыр 80 мың га болса, биыл 123 мыңға жетті. Яғни бізге мақсары майын өндіруге болады. Мақсары майы зайтүн майына ұқсайды, құрамында холестерині аз. Егер бұл жоба іске асса, ол өзін ақтауы қажет»,-деді БҚО әкімі Ғали Нәжімеденұлы.
