Қазақстанда аяқ киім өндірісі бір жылда 43%-ға өсті. Бірақ оған қарамай аяқ киімнің бағасы 21%-ға қымбаттаған, деп хабарлайды kazbusiness.kz energyprom.kz-ке сілтеме жасап.
Осы жылдың қаңтар-ақпан айларында отандық өндіріс орындары 286,7 мың жұп аяқ киім шығарған. Бұл өткен жылмен салыстырғанда 42,9%-ға артық.
Өңірлік бөліністе ең көп аяқ киім Алматыда өндірілген, барлығы – 153 мың жұп. Бұл көрсеткіш 2022 жылғы қаңтар-ақпанға қарағанда 50,4%-ға артық. Сондай-ақ, өндіріс бойынша алғашқы үштікте Алматы облысы (48,5 мың жұп) және Жамбыл облысы (27,9 мың жұп) бар.
Жалпы былтыр жыл ішінде елімізде 1,7 млн жұп аяқ киім өндірілген.
Дегенмен, отандық өндірістің өсуіне қарамастан, өткен жылдың қорытындысы бойынша жергілікті компаниялар еліміздегі аяқ киімге сұраныстың небәрі 4,2%-ын қамтамасыз еткен. Бір жыл бұрын көрсеткіш одан да төмен болған – 2,8%. 2022 жылы нарықтағы отандық өнімнің үлесі бір жарым есеге жуық өскенімен, жалпы үлесте өте аз болып қала береді.
Тағы бір ескеретін жайт, аяқ киім импорты бір жылда 22,9%-ға, яғни 38,7 млн жұпқа дейін азайған. Бұл ретте елдегі экспорт көлемі де 50,2%-ға (105,5 мың жұпқа дейін) төмендеген.
Биыл ақпан айының қорытындысы бойынша аяқ киімнің бағасы бір жылда 20,5%-ға өскен. Оның ішінде ерлер мен әйелдер аяқ киімі 18,2%-ға, балалар аяқ киімі 26,5%-ға қымбаттады.
Аяқ киім бағасы әсіресе, Маңғыстау облысында қымбаттаған. Мұнда баға бір жылда бірден 31,5%-ға өскен. Аяқ киім бағасы аспандап тұрған өңірлер қатарында Шымкент (30,2%) және Астана (28%) қалалары бар. Ал баға өсімі 13,7%-ды құраған Ұлытау облысы қымбатшылықты ең аз сезінген өңір болды.
Айта кеткен жөн, биыл 1 сәуірден бастап, цифрлық таңбалау және тауарларды бақылау жүйесінде тіркелмеген аяқ киімдерді сатуға болмайды. Мамандардың пікірінше, бұл аяқ-киімнің қымбаттауына әсер етуі мүмкін. Бірақ Индустрия және инфрақұрылымдық даму министрлігі аяқ киімнің цифрлық таңбалануы бағаның өсуіне әсер етпейтінін айтады. Өйткені кәсіпкерлер DataMatrix кодын ҚҚС-сыз (қосылған құн салығы) 2,68 теңгеге ала алады.
Министрлік таңбалау қажеттілігін әрбір екінші аяқ киім Қазақстанға заңсыз әкелінетіндігімен түсіндіреді. Ресми деректер бойынша, Қазақстандағы аяқ киімнің көлеңкелі айналымының үлесі 48%-ды құрайды.
