Бұған дейін атом электр станциясын салу үшін Алматы облысы Жамбыл ауданы Үлкен ауылының маңынан орын таңдалған болатын, деп хабарлайды kazbusiness.kz порталы ҚР Энергетика министрлігінің сайтына сілтеме жасай отырып.
“Атом энергиясын пайдалану туралы” ҚР Заңының 12-бабына сәйкес ядролық қондырғыларды салу және салу ауданы туралы шешімді аумағында қондырғы салу жоспарланып отырған жергілікті өкілді органдардың келісімімен Қазақстан Республикасының Үкіметі қабылдайды. Бұл ретте мәслихат жергілікті өкілді орган болып табылады. 2022 жылғы қарашада Алматы облысы мәслихатының кезекті сессиясында аудан тұрғындарын қолдау шартымен құрылысқа келісім беру туралы шешім қабылданды.
Осыған байланысты Алматы облысының әкімдігі жария талқылаулар өткізуге бастамашы болды. Бұл ретте Экологиялық кодекске сәйкес өткізілетін қоғамдық тыңдаулар жобалық құжаттама әзірленгеннен кейін жобаны экологиялық бағалау кезеңдерінде кейінірек бастамашылық етілетін болады.
