Елімізде қалалар мен облыс, аудан аттары, ауыл және көше атаулары, саябақтар мен маңызды тарихи орындар аты өзгертілер кезде халық пікірі ескеріледі. Құжат қоғам талқылауына шығарылды.
Жоба әкімшілік-аумақтық бірліктерге, елді мекендердің құрамдас бөліктеріне атау беру, оларды қайта атау, сондай-ақ олардың атауларының транскрипциясын нақтылау мен өзгерту кезінде тиісті аумақ халқының пікірін ескеру қағидаларын бекіту тақырыбымен талқылауға ұсынылған. Құжат “Ашық НҚА” порталында жарияланды. Әрі қоғам талқылауында жоба 29-шы мамырға дейін болады.
Қоса беріліп отырған Әкімшілік-аумақтық бірліктерге, елді мекендердің құрамдас бөліктеріне атау беру, оларды қайта атау, сондай-ақ олардың атауларының транскрипциясын нақтылау және өзгерту кезінде тиісті аумақ халқының пікірін ескеру қағидалары бекітілсін, – делінген жоба бұйрығында.
Құжат ауылдарға, кенттерге, ауылдық округтерге, қаладағы аудандарға, қалаларға, аудандарға, облыстарға, шағын аудандарға, алаңдарға, даңғылдарға, бульварларға, көшелерге, тұйық көшелерге, саябақтарға, скверлерге, көпірлерге және елді мекендердің басқа да құрамдас бөліктеріне атау беру және оларды қайта атау, сондай-ақ олардың атауларының транскрипциясын нақтылау және өзгерту кезінде тиісті аумақтағы халықтың пікірін ескерудің тәртібін анықтайды.
Яғни қандай да бір атауды өзгертпес бұрын жергілікті атқарушы органдар қоғамдық жиналыс өткізеді.
