Астанада алаяқтар зейнеткерден Меккеге қажылыққа бару үшін жинаған 16 млн теңгесін алып кетті, деп хабарлайды kazbusiness.kz ақпарат агенттігі Polisia.kz-ке сілтеме жасап.
Ақпаратқа сәйкес, елорда тұрғыны полицияға арызбен жүгінген. Жәбірленушінің айтуынша, белгісіз біреулер телефонға қоңырау шалып, қызының полицияда екендігін және мәселені шешу үшін шұғыл түрде ақша жіберу керек екенін хабарлаған. Осылайша алаяқтар зейнеткерден 16 млн теңге көлемінде ақшаны алдап алған.
“Анашым, мен апатқа ұшырадым, қазір проблемаларымды шешу үшін полицияда жүрмін, маған ақша керек”, деді телефон соққан жандар. Содан кейін телефонды ер адам алып, өзін полиция қызметкері ретінде таныстырып, қазір әріптесі келіп, қолма-қол ақшаны алып кететіндігін айтты”, – дейді 69 жастағы зейнеткер.
Мәселені шешу үшін қанша ақша керек деген сұраққа, олар қанша бар соны беріңіз деп жауап берген. Егде жастағы әйел мән-жайды түсінбей, ақша жинай бастаған.
“Зейнеткер Меккеге қажылық жасау үшін жинаған 16 млн теңгесін санаған. Бірақ қызының қауіпсіздігі маңыздырақ деп ойлап, ақшаны келген адамға берген. Кейін есіне түсіп, қызының жағдайы жақсы екендігін, өзінің алаяқтардың құрбаны болғанын түсінген ол полицияға жүгінген”, – делінген хабарламада.
