Қазақстандық жүргізушілер бұдан былай техникалық байқау құжатын өздерімен бірге алып жүруге міндеттелмейді. Құжат күзде EgovMobile-да цифрландырылады, деп хабарлайды kazbusiness.kz тілшісі Индустрия және инфрақұрылымдық даму министрлігіне сілтеме жасап.
Министрлік “Ұлттық ақпараттық технологиялар” АҚ-мен бірлесіп автомобильдің техникалық байқаудан өткенін куәландыратын құжатты цифрлық форматқа көшіру бойынша белсенді жұмыс жүргізуде, “техникалық байқаудың диагностикалық картасы” электрондық үкіметтің мобильдік қосымшасының жеке кабинетінде сақталатын болады.
“Бүгінгі таңда айти мамандары сервис әзірлеп, техникалық жұмыстар жүргізуде. Интеграциялық жұмыстардан кейін сервистің пилоттық нұсқасы ағымдағы жылдың 1 қыркүйегінде EgovMobile-да жарияланады”, – деді ведомствода.
Жобаның жоспары бойынша құжаттың сандық нұсқасы тексеруші органдардың дерекқорында сақталады және оның болуын нақты уақыт режимінде тексеруге болады.
ИИДМ цифрлық құжаттардың қағаз аналогтарына тең заңды күші бар екенін және оларды пайдалану неғұрлым ыңғайлы екенін атап өтті: сыбайлас жемқорлық тәуекелдері жойылып, қоғамның сенімі артады.
Естеріңізге сала кетейік, 2021 жылдың ақпан айында Қазақстанда “ҚР кейбір заңнамалық актілеріне жол қозғалысы мәселелері бойынша өзгерістер мен толықтырулар енгізу туралы” заң күшіне енді, оған сәйкес жүргізушілер жүргізуші куәлігі мен техникалық байқау құжатын өздерімен бірге алып жүру міндетінен босатылуы қажет. Бұл құжаттардың жоқтығы үшін айыппұл салынбайды. Алайда, автокөлік жүргізушісінде жеке куәліктің түпнұсқасы немесе төлқұжаты болуы керек.
