Бүгінде кәсіп ашып, ісін дөңгелетемін деген әр жанға мемлекеттен қолдау бар. Сондай бағдарламалардың бірі – “Бизнес Бастау” мемлекеттік бағдарламасы. Аталған жоба аясында шымкенттік Малика Убайдуллаева өз ісін ұршықша үйіріп отыр. Кәсіпкер басқаратын шағын компания шығаратын кофе мен қант әрбір дастарханның дәмін кіргізсе, бір реттік дымқыл майлықтары әрбір адамның қолынан табылуда, деп хабарлайды Kazbusiness.kz.
Отбасын да, кәсібін де бір арнаға тоғыстырған Малика бұл салаға келмес бұрын он сегіз жыл бойы мемлекеттік қызметте жұмыс істеген. Содан өміріне өзгеріс енгізіп, қосымша табыс табу жолын қарастырады. Осынау қайнаған тіршілікте ол 2019 жылы “Бастау Бизнес” жобасы бойынша білім алып, кәсіпкерлік әлеміне қадам басты.
“Бастау Бизнес” курсында кәсіпкерлікті қалай бастаудан бастап, оны қалай жүргізу, дамыту қажеттігін толығымен меңгердім. Мемлекет тарапынан көрсетілген осындай зор қолдауға өз ризашылығымды білдіремін. Сонымен қатар бұл тұрғыда маған осы салада тәжірибесі бар жолдасым да өз қолдауын көрсетті», – дейді іскер келіншек.
Осылайша кәсіпкерліктің қыр-сырымен жете танысу арқылы «NEFIS GROUP» атты жаңа компанияның негізі қаланды. Кез келген істі ұршықша иіріп әкететін Малика Рахымбайқызы өзінің бизнес жоспарында бір рет қолдануға арналған дымқыл майлықтарды шығару ісін бүге-шүгесіне дейін баяндап берді. Майлықтың ерекшелігі антисептикалық болып табылатындығында. Коронавиуспен әлі күнге дейін күресіп келе жатқан біздің қоғам үшін бұл таптырмас тазалық құралы екені сөзсіз. Инновациялық жоба ретінде байқауда бақ сынаған оның жобасы комиссия мүшелері тарапынан қолдау тапты. Осылайша Малика Рахымбайқызы мемлекет тарапынан берілетін қайтарымсыз 3 млн. теңге көлеміндегі гранттың иегері атанды.
“Грант қаржысы кәсібін енді ғана қолға алып жатқан маған сол сәтте өте үлкен қолдау болды. Бұл бағытта жолдасым да қаржылық қолдау көрсетіп, Түркия мемлекетінен майлықтарды шығаруға арналған аппаратты арнайы тапсырыспен алдырдық. Осылайша жұмысымызды бастап кеттік”, – дейді Малика Убайдуллаева.
Күннен күнге өрісі кеңге жайылып келе жатқан кәсіпорын қазіргі таңда тәулігіне 25 мың дана ылғалды майлықтар шығаруға мүмкіндігі бар.
Жоғарыда атап өткеніміздей, Малика Убайдуллаеваның жолдасы Әлімжан Убайдуллаев бұған дейін өз кәсібін дөңгелетіп жүргізіп келе жатқан кәсіпкер-тін. Ол елге кеңінен тараған 3 те 1 деп аталып кеткен кофе шығару ісімен айналысатын.
2019 жылы құрылған “NEFIS GROUP” ЖШС өмірдегі жарасымды жұптың басын кәсіпте де тоғыстырды. “Бір жағадан бас, бір жеңнен қол” шығарып, іске білек сыбана кіріскен ерлі-зайыптылардың кәсібі өрге домалай бастады.
“Жұмыла көтерген жүк жеңіл” демекші, осылайша “NEFIS GROUP” ЖШС дамудың даңғыл жолына бет алды. Ордабасы» индустриялды аймағында орналасқан “NEFIS GROUP” компаниясы бүгінде 36 адамды жұмыспен қамтып отыр. Ел бойынша өндірісте көшбасшы болуды көздейтін компанияның алға қойған жоспарлары да жетерлік. «Қазақстанның үздік тауары – 2022» деп аталатын өңірлік байқау-көрмесінде жүлделі үшінші орынды иеленген компания алдағы уақытта бұдан да биік белестерді бағындырмақ.
“Жылдам еритін қант пен құрғақ сүт араласқан NEFIS-CAFE 3in1 өзінің хош иістілігімен ерекшеленеді. Өнім бүкіл әлемде танымал индонезиялық кофенің ең жақсы сорттарына негізделген. Жаңа дизайнмен қайта жаңғырған NEFIS-CAFE-нің дәмі оны татып көргендердің таңдайында ұзақ сақталары сөзсіз. Халықтың қажеттілігіне қарай қолға алынған кәсіп болғандықтан, сусынның бұл түріне деген сұраныс күн санап арта түсуде”, – дейді кәсіпкер әйел.
Кәсіпкер Малика Рахымбайқызының айтуынша, өзі басқаратын өндіріс орнына Германия, Түркия сынды шет мемлекеттерден әкелінген соңғы үлгідегі арнайы аппарармен жұмыс істейтін мамандарды табу да оңайға соқпапты. Мамандарды бұл бағытта оқыту арқылы осы бір мәселенің түйінін тарқатыпты.
