Жеке кәсіпкерлік немесе жауапкершілігі шектеулі серіктестікті (ЖШС) тіркеу үшін ең алдымен оның бастапқы нысанын анықтап алу қажет, деп жазады kazbusiness.kz ақпараттық порталы.
Қазіргі кезде екі қызметті де онлайн түрде ашу мүмкіндігі бар. Ал бұл жолы ЖШС тіркеу жолы туралы баяндаймыз. Мұндай қызмет түрін халыққа қызмет көрсету орталығына (ХҚО) барып алуға болады, бірақ онлайн тіркеу әдісі азаматтың уақытын үнемдейді.
Деректердің басым бөлігі мемлекеттік органдардың деректер қорында көрінетіндіктен, негізгі әрекеттер төмендегідей әдіспен жүзеге асырылады:
- ЭЦҚ көмегімен https://egov.kz/cms/kk порталынан авторизациядан өту;
- «Заңды тұлғаларды мемлекеттік тіркеу, олардың филиалдары мен өкілдіктерін банк шотын ашуды және қызметкер еңбек (қызметтік) міндеттерін атқарған кезде оны жазатайым оқиғалардан міндетті сақтандыруды ескере отырып есептік тіркеу» қызметін табу;
- Заңды тұлғаны тіркеу түрін таңдау;
- Өтінімде мекенжай деректерін, үш тілдегі атауы мен басшының деректерін және құрылтайшылар туралы мәліметтерді көрсету;
- ЖШС шотын ашу үшін банкті таңдау;
- Сақтандыру шартын жасау;
- ЭЦҚ көмегімен өтінімге қол қою.
Айта кетейік, егер ЖШС құрамында бірнеше құрылтайшылар болса, онда әрбір құрылтайшының өтінімге қол қоюы талап етіледі.
Қызмет көрсету мерзімі – 1 жұмыс күні. Ал шағын орта бизнес (ШОБ) субъектілері үшін – 1 сағат.
