Наурыз айының қорытындысы бойынша еліміздегі кинотеатрлардың қызметтер бағасы бір жылда 12,3%-ға өскен. Оның ішінде еліміздің үш аймағында бағалар тіпті 20%-дан астам қымбаттаған, деп хабарлайды kazbusiness.kz energyprom.kz-ке сілтеме жасап.
Киноға барудың қымбатшылығын әсіресе, Ақмола облысының тұрғындары сезінген, мұнда баға 66,7%-ға өскен. Сондай-ақ, бағасы асқақтаған өңірлер қатарында Батыс Қазақстан (27,7% өскен) және Абай (25% өскен) облыстары да бар.
Кинотеатрдағы қызметтердің жылдық бағасы ең аз қосылған өңір ретінде – Қызылорда (+0,2%), Қарағанды (+2,8%) және Атырау (+3,9%) облыстары тіркелді. Бұл ретте Шымкентте кинотеатрлар қызметінің құны 2,8% ға төмендегенін айта кеткен жөн.
Үкіметтің ресми мәліметінше, еліміздің кинотеатрларында қазақстандық фильмдердің прокатын 2030 жылға қарай 35%-ға дейін ұлғайту жоспарланған.
Айта кеткен жөн, өткен жылы жалпы кино саласында – кинофильмдер және телевизиялық бағдарламалар өндіру, сондай-ақ дыбыс жазу және музыкалық туындылар шығару саласында 68,1 млрд теңгеге қызмет көрсетілген.
