Экология және табиғи ресурстар министрі Зүлфия Сүлейменова Абай облысындағы орман шаруашылығы қызметкерлерінің рациямен айтылған соңғы сөздері қандай болғанын айтты, деп хабарлайды kazbusiness.kz.
Сүлейменова қаза тапқандардың отбасына көңіл айтты. Оның сөзінше, орман шаруашылығындағылар 8 маусымда байланысқа шығуы тоқтаған.
«Кеше 14 адам өлі табылды. Біз 8 маусымда сағат 21.00-де олармен байланыссыз қалдық. Рация арқылы соңғы естігеніміз – жел бағыты бірден өзгеріп, қалың түтін басып жатқаны айтылды. Бәрі шешіліп кетер деп үміттендік. Қалың түтін салдарынан оларды табу мүмкін болмады. Кеше олар өлі табылды. Қаза тапқандардың жақындарына қайғыра көңіл айтамын», – дейді министр Зүлфия Сүлейменова.
Министрдің сөзінше, жағдай қиын. Жел күшейіп кеткен. Одан бөлек, болжам бойынша, алдағы бірнеше күнде жел қатты болады.
Еске салайық, Абай облысында алапат өрт болды. ТЖМ соңғы деректері бойынша өртті сөндіруге шамамен 1500 адам және 290-нан астам техника жұмылдырылған. Өрт басталғаннан бері барлығы 1000 тоннадан астам су төгілді.
Абай облысында өрт кезінде орман шаруашылығының 14 қызметкері қаза тапты.
Тоқаев 12 маусымды орман өрттерінің құрбандары үшін Жалпыұлттық аза тұту күні деп жариялады.
