Заң аясында Нұрсұлтан Назарбаев кеңсесінің жұмысы тоқтатылады. Бұл туралы вице-премьер – қаржы министрі Ерұлан Жамаубаев айтты, деп хабарлайды kazbusiness.kz.
Оның айтуынша, қазір кеңсені қайта құрылымдау процесі жүріп жатыр. Қызметкерлерді жұмыстан шығару, орындарды басқаларға беру жұмысы жүргізілуде.
«Кез келген адамды жұмыстан шығару үшін біз еңбек заңын сақтауымыз керек. Елбасы кеңсесі жалпы заңда көрсетілген аясында ғана жұмыс істейтін болады. Тек қана кеңсе емес, кітапхана бар, онда құнды-құнды дүниелер бар. Оны қандай министрліктің, қандай мемлекеттік органның аясына ауыстыру керек, қайта құру керек, жалғыз тастап кетпейміз ғой», – деді Жамаубаев.
Осы орайда журналистер одан Елбасы кеңсесі жұмысын жалғастыра ма, жоқ әлде тоқтатыла ма деп нақтылады.
«Қазір қайта құрылымдау процесі жүріп жатыр. Негізінен жалпы заң аясында оның жұмысы тоқтатылады», – деді министр.
БАҚ өкілдері «Назарбаевтың кеңсесін жапса, экс-президент қайда жұмыс істейді?” деп те сұрады.
«Мұны оның айналасындағы адамдардан сұраңыздар. Мен қайдан білейін. Олардан сұраңыз, басқа кеңселері бар шығар», – дейді вице-премьер.
Қаржы министрінің сөзінше, қайта құрылымдаудан шамамен алғанда 2-3 млрд теңге қаржы үнемделеді. Ол Назарбаев кеңсесі жақын арада жұмысын тоқтататынын айтты.
