Талай адамның тағдырының түрленуіне ықпал еткен 2021-2025 жылдарға арналған кәсіпкерлікті дамыту жөніндегі ұлттық жобасы Алматы облысында қарқынды жүзеге асуда. Бүгінгі күні санмыңдаған адам екі қолға, бір күрек тауып, өзінің сүйікті ісімен айналысуына мүмкіндік алған жайы бар. Солардың бірі, Қарасай ауданының тұрғыны Нұрзат Бердіқан.
Ол Қытай Халық Республикасының тумасы. 2012 жылы ата жұртқа қоныс аударған. Қазіргі таңда Алматы облысы Қарасай ауданының тұрғыны. 4 баланы тәрбиелеп отырған көп балалы ананың негізгі мамандығы – ұстаздық. Қытайдағы жоғарғы оқу орнында арнайы білім алған.
Туған топыраққа көшіп келгеннен кейін Нұрзат Бердіқан үйде отырып, ауыл арасында компьютер арқылы жұмыс жасаған. Сол кездегі алғашқы қадамдар кәсіпке бастар жол болғанын білмесе керекті.
«Үйде бала тәрбиесімен айналысқан соң басқа жұмысқа шығудың ыңғайы келмеді. Оның үстіне ата-енемен бірге тұрамыз. Күнделікті үйдің тірлігін алып жүру тағы бар. Компьютер тілін білгендіктен осы бағытта жұмыс жасап көруге бел будым. Түрлі оқуларын да оқыдым. Бір жағы жолдасымның көмегі көп тиді. Оның негізгі мамандығы IT саласымен байланысты», -дейді кәсіпкер.
Отбасының жанында, ұрпақ тәрбиесімен айналысқан ананың армандарының бірі осы ісін кеңейту болған еді. Талайдан бергі көкейіндегі ойының іске асуына мемлекет берген мүмкіндік сеп дейді өзі.
2019 жыл Нұрзат Бердіқанның жаңа белеске көтерілуіне жол ашқан кезең болды. Дәл сол жылы ол кәсіпкерлікті дамытуға қатысты ақпараттарды іздестіреді. Көк жәшіктен күнде берілетін хабардың бірінде кәсіпкерлікті оқытуға қатысты мағұлматты құлағы шалып, артынша осының анық-қанығына көз жеткізбекке ниет етеді. Әр ісінде қолдау көрсететін отағасы, өзінің жан-жары бұл жолы да жұбайының жаңа іске білек сыбана кірісуіне рұқсатын беріп, « кәсібіңді аш, сенің қолыңнан келеді», деп жігерлендіреді. Міне, жолдасының бір ауыз сөзі оның қанатын қомдауына себепкер болды.
«Ақпаратты естігеннен кейін, ортақ шешімге келіп, тұрғылықты жердегі «Атамекен» кәсіпкерлік палтасына барып кеңес алып, өтініш қалдырдым. Арада біраз уақыт өткен соң оқуға шақырды. Арнаулы білім алып, сертификатты сәтті қорғадым»,- деп сөзін сабақтады Нұрзат.
Сынақтан сүрінбей өтткен Нұрзат Бердіқанның қуанышы қойнына сыймағаны белгілі. Дегенмен жеке іске аяқ басқан жанның ойын «сертификат қолда, енді не істеу керек?» деген сұрақ мазалаған еді.
Бұл сауалдың шешімін Нұрзат жұмыспен қамту орталығынан іздеп барады.
«Жұмыспен қамту орталығының мамандары бизнес жоба даярлап, оны қорғау керектігін айтты. Кәсіптік бағдарымызды бүге-шүгесіне дейін жолдасым екеуміз өз күшімізбен жазып шықтық. Жоспар өзіміз үшін сәтті шықты. Ендігі кезек оны қорғауға келді. Басында қобалжу болды. Өтпей қаламба деген күдіктің болғанын жасырмаймын. Алайда, сәттілік күліп қарады ма, кедергісіз қорғадым»,-дейді кәсіпкер.
Нұрзаттың айтуынша, қазіргі таңда өзі жұмыс жасайтын компьютерлік салонда бірнеше қызмет түрі көрсетіледі. Атап айтсақ, тойға шақыру, баннер, үлкен және кіші көлемдегі суреттер шығару, қағаздарды басып шығару , визитка жасау, әрі кеткен суреттерді жаңалау сынды қызметтер ұсынылады. Әзірге бір өзі еңбек ететін сурет салонын алдағы уақытта кеңейту көзделген.
«Егер нақты шешім қабылдамағанда, жеке іс бастамас едім, деген Нұрзат Бердіқан осындай жобаны іске қосқан мемлекетке алғысын айтуда.
«Жастарды,көп балалы аналарды қолдап, қуаттап үлкен жетістікке жетуге мүмкіндік беріп отырған үкіметке рақмет. еліміз аман, жұртымыз тыныш болсын!»,-деп сөзін түйіндеді Нұрзат Бердіқан.
