Бас прокуратураның баспасөз қызметі мәліметінше, өткен жылы қабылданған шаралардың нәтижесінде қаражатты тәркілеу, жер телімдерін, жылжымайтын мүліктер мен көліктерді қайтару арқылы мемлекетке 9,2 миллиард теңгеден астам шығын өтелді, деп хабарлайды kazbusiness.kz.
Биыл заңсыз мүлікті тәркілеу нәтижесінде 1,5 млрд теңге жиналды. Прокурорлар мүлікті иеліктен шығару туралы келісім-шарттарды жарамсыз деп тану туралы 36 талап арыз беріп, оның 25-і қанағаттандырылған. Олардың қатарында келесі мысалдарды айта аламыз:
Жоғарғы Сот Бас Прокурордың наразылығы негізінде Алматы қаласының апелляциялық сотының «Горный Гигант» ықшамауданындағы жер телімдері мен «RBK Bank» АҚ жымқыру ісі бойынша сотталғандардың көліктерін тәркілеуден босату туралы шешімінің күшін жойды. Нысандар мемлекетке қайтарылды.
Мемлекетке келтірілген материалдық шығынды өтемеген тұлғаларға адамгершілік әрекеттерді негізсіз қолдану фактілері анықталды.
Атырау облысында прокурордың өтініш хаты бойынша 1,5 млрд теңгеден астам шығынды өтемеген азамат «Б»-ны мерзімінен бұрын шартты түрде босату туралы қаулының күші жойылды.
