Өткен жылы өнер кәсіп саласында аталмыш ауданның асықтары алшысынан түскен. Өйткені, өнеркәсіп өндірісінің көлемі 2022 жылдың қаңтар-желтоқсан айларында 531,1млрд теңгені құрап, былтырғы жылмен салыстырғанда 135,4 млрд. теңгеге артық орындалған. Сәйкесінше, нақты көлем индексі 134,8%-ға жетіп жығылған. Бүгінгі таңда облыстық өнеркәсіп өндірісіндегі ауданның үлесі – 33,4%.
Айта кетейік, өткен жылы ауданда бірқатар кәсіпорындар есігін айқара ашқан еді. Атап айтар болсақ, «Каз энерго пауер» ЖШС трансформаторлық қосалқы станциялар мен электр қалқан жабдығын өндіретін кәсіпорны, 750 млн. теңге инвестиция тартып, 55 жұмыс орнын, «Омега Специй» ЖШС дәмдеуіштер зауыты іске қосылып, 670 млн.теңге инвестиция тартып, жаңа 100 жұмыс орнын және «Агрофинанс» ЖШС көкөніс қоймасын ашып, 350 млн. тенге инвестиция тартып, тұрақты 25 жұмыс орны ашылған болатын.
Нәтижесінде, 2022 жылы өнеркәсіп өндірісі саласында жаңадан ашылған бірқатар кәсіпорындардың есебінен өсім 34,8%-ға артып отыр.
