Мемлекеттік кірістер комитеті 2022 жылдың 7 айында Қазақстан Республикасының Қытай Халық Республикасымен өзара сауда айналымы жайлы мәліметтер жариялады, деп хабарлайды kazbusiness.kz ведомствоның баспасөз қызметіне сілтеме жасап.
2022 жылдың 7 айында Қытай Қазақстан Республикасымен саудада 1-орында ( ЕАЭО-ға мүше мемлекеттерді есепке алмағанда ). Сыртқы тауар айналымындағы Қытайдың үлесі 22,6 %-ті құрайды.
Тауар айналымының көлемі 13,5 млрд АҚШ долларын құрады, бұл 2021 жылдың сәйкес кезеңімен салыстырғанда 38,3 % –ке артық, өткен жылы ол 9,7 млрд. АҚШ долларын құраған.
Тауар айналымының көлемі тауарлар экспортының 52 % – ке өсуі есебінен ұлғайды.
Қазақстанның Қытайға экспорты осы жылдың 7 айында 8 млрд. АҚШ долларын құрады, 2021 жылғы сәйкес кезеңге қарағанда 52 % -ке өсті. Мысалы, өткен жылдың 7 айында экспорт 5,3 млрд АҚШ долларын құраған.
Экспорттың негізгі өсуі минералдық өнімдердің 84,2 %-ке ұлғаюы есебінен байқалады (2022 жылдың 7 айында – 5,1 млрд. АҚШ доллары, 2021 жылғы 7 айында – 2,8 млрд. АҚШ доллары), соның ішінде отын-энергетикалық тауарлар экспорты 2,2 есеге артты (2022 жылдың 7 айында – 3,2 млрд. АҚШ доллары, 2021 жылғы 7 айында – 1,5 млрд. АҚШ доллары).
Қазақстанның Қытайдан импорты 5,5 млрд. АҚШ долларын құрады, 2021 жылғы сәйкес кезеңмен салыстырғанда 22,6 %-ке өсті. Өткен жылдың 7 айында импорт 4,5 млрд. АҚШ доллар құрады.
Импорттың негізгі өсуі келесі тауар топтары бойынша байқалады:
- машиналар, жабдықтар, көлік құралдары, аспаптар мен аппараттар 19,4%-ке (2022 жылдың 7 айында – 3,1 млрд. АҚШ доллары, 2021 жылғы 7 айында – 2,6 млрд. АҚШ доллары);
- химия өнеркәсібінің өнімі 64,7 % –ға (2022 жылдың 7 айында – 821,1 млн. АҚШ доллары, 2021 жылғы 7 айында – 498,4 млн. АҚШ доллары);
- металдар және олардан жасалған бұйымдар 53 % –ке (2022 жылдың 7 айында – 501,4 млн. АҚШ доллары, 2021 жылғы 7 айында – 327,8 млн. АҚШ доллары).
