Ұлттық статистика бюросы еліміздегі ер азаматтарының саны және олардың жұмысы туралы мәліметтермен бөлісті, деп хабарлайды kazbusiness.kz.
ҰСБ мәліметінше, 2023 жылдың басында халық саны 19 миллион 766 мың адамды құрады, оның 9 миллион 647 мыңы – ер-жігіттер.
0-14 жас аралығында – 3 млн ұл бала. Ал еңбекке жарамды 15 пен 62 жас аралығындағы ерлер саны – 5 миллион 876 мың, сондай-ақ 63 және одан жоғары жастағы – 767 мың зейнеткер бар.
Өңірлер арасында ер азаматтар Түркістан облысында ең көп шоғырланған – 1 миллион 79 мың, ал ең азы Ұлытау өңірінде – 108 мың.
Жұмыспен қамту мәселесіне келсек, ерлердің басым бөлігі өнеркәсіпте – 16,8%, көтерме және бөлшек саудада 14%, автокөлік жөндеуде, тағы 14% ауыл, орман және балық шаруашылығында жұмыс істейді.
Айта кеткен жөн, ер азаматтардың өмір сүру ұзақтығы – 70,2 жас. Орташа жасы – 30,5 жас. Некеге тұрудың орташа жасы – 28 жас.
