Балаларды ұруға заңмен тыйым салынуы мүмкін. Мұндай ұсынысты БҰҰ Қазақстандағы балалар қорының өкілі Артур Ван Дизен айтты деп хабарлайды Kazbusiness.kz
Мамандардың айтуы бойынша, үйде ата-анасынан зорлық-зомбылық көріп өскен бала өскенде мектеп қабырғасында өзге оқушыларға әлімжеттік көрсетіп, қатыгездікке барады.
Тәртіп сақшыларының дерегінше, жыл сайын 100 мыңнан астап жеткіншектің тарапынан қоңырау келіп түседі екен. Алайда, агрессор тарапына арыз жазылмағандықтан, жазадан оңай құтылып кетеді.
Ал енді ешкімнің арыз жазуын күтпей-ақ, полиция қызметкерлері жақын жердегі бейне-бақылау камерасын қарап, көршілерден түсініктеме алып, ұрып-соққан ата-анаға іс қозғай береді.
– Дене жарақатын салуға заңмен тыйым салу – өте маңызды. Бүгінде 65 мемлекетте бұл заң күшіне енді. Тағы 27 ел бұл заңға қосылуды жоспарлап отыр. Оның арасында Қазақстанның көршілері де бар. Сондықтан отбасында да, отбасынан тыс жерде де дене жарақатына тыйым салу маңызды болып отыр. Біз балаларға зорлық-зомбылық жасалуына, оларды ұрып-соғуға жол бермеуіміз керек. Бұл – қоғам алдындағы міндетіміз, – деді БҰҰ Қазақстандағы балалар қорының өкілі Артур Ван Дизен.
Ал полицейлер «балаларды түнгі уақытта көшеге жалғыз жібермеу керек» деп отыр. Қазақстанда жыл сайын көшеде беймезгіл жүрген 100 мыңнан астам жеткіншек полиция бөлімшесіне жеткізіледі. Ал осы жылдың басынан бері үйлерінен тыс жерде жүрген 22 мыңнан астам кәмелетке толмаған бала ұсталыпты.
