Ауыл шаруашылығы вице-министрі Әбілхайыр Тамабек Үкімет отырысында Қазақстанның қант саласы қалай дамытылатынын айтып берді.
Мемлекет басшысының тапсырмасына сәйкес, қант саласын дамытудың 2026 жылға дейінгі кешенді жоспары әзірленді. Аталған жоспар қант қызылшасының егіс алаңдарын кеңейту арқылы шикізат базасын ұлғайтуды, жаңа суармалы жерлерді іске қосуды, суарудың су үнемдеу технологияларын енгізуді, тұқым шаруашылығын дамытуды, қант қызылшасын қайта өңдеу бойынша зауыттардың қуаттылығын техникалық және технологиялық қайта жарақтандыруды, сондай-ақ жаңа инновациялық зауыт салуды көздейді.
«Бұдан бөлек, 2023 жылдың 1 қаңтарынан бастап қант өндірушілер үшін ҚҚС 70 пайызға дейін төмендетіледі. ҚР Салық кодексінің 411-бабына сәйкес 2023 жылғы Кешенді жоспарда аталған преференцияның қолданылу мерзімін ұзарту жөніндегі іс-шара, сондай-ақ тізбені құрақ қантпен толықтыру да көзделген. Бұдан басқа, қантқа бағалардың ең төменгі деңгейін (БТД) енгізу, мемлекеттік қолдау шараларын ұсыну тетігін жетілдіру, оның ішінде, қант қызылшасын қайта өңдеуге тапсыру кезінде субсидиялау нормативтерін және тұқымдар мен будандар бағасының өсуін ескере отырып тұқым шаруашылығын субсидиялау нормативтерін ұлғайту мәселелері пысықталатын болады», – деді вице-министр. Жалпы шикізат базасын дамытуға арналған инвестициялардың көлемі шамамен 495 млрд. теңгені құрайтын болады. Материалдық-техникалық құндылықтарды субсидиялаудың қажетті көлемі 168 млрд. теңгені құрайды, оның ішінде қант зауыттарының негізгі және айналым қаражатын толықтыруға қажетті субсидиялар көлемі 39,3 млрд. теңге.
Кешенді жоспарды іске асыру алдағы 5 жылда отандық шикізаттан өндірілетін қант көлемін 250 мың тоннаға дейін жеткізуге мүмкіндік береді. Бұл ретте 2026 жылға қарай 2021 жылмен салыстырғанда, импорт үлесі 58%-дан 17%-ға дейін төмендейді, отандық шикізатты қайта өңдеу есебінен қамтамасыз етілу 7% -дан 43% дейін ұлғаяды.
