Еліміздегі бұқаралық ақпарат құралдарында ҚР Үкіметінің 2022 жылғы 22 қазандағы №843 қаулысының, атап айтқанда “ҚР аумағында өндірілетін жекелеген доңғалақты көлік құралдарына қатысты міндетті талаптарды қолдану және олардың сәйкестігін бағалауды жүргізу қағидаларын бекіту туралы” нормаларының қате таралуына байланысты Индустрия және инфрақұрылымдық даму министрлігі аталған құжаттың маңыздылығы мен қоғамға дұрыс жеткізілуін түсіндіруді орынды деп санайды.
“Бұл қаулы ЕАЭО елдері қол қойған “Кеден одағы Комиссиясының 2011 жылғы 9 желтоқсандағы №877 шешіміне өзгерістер енгізу туралы” Еуразиялық экономикалық комиссия Кеңесінің 2022 жылдың 5-ші сәуірдегі №45 шешімін іске асыру мақсатында қабылданды. Үкіметтің 2023 жылдың 1 ақпанына дейінгі заңды күші бар қаулысы өндірушілерге ABS, ESP, сондай-ақ қауіпсіздік жастықтарымен жабдықталмаған және экологиялық санаты төмендетілген автокөліктерді шығаруға тікелей құқық бермейді”, – делінген хабарламада.
Тиісті жүйелермен жабдықталмаған автомобильдерді шығаруға рұқсат алу үшін өндіруші белгілі бір компоненттерді орнатпауына қарамастан көлік модельдерін жеке сертификаттаудан өткізіп, оның қауіпсіз болуы міндетті. Бұл шарт ЕЭК Кеңесінің шешімдерінде қарастырылған.
“Демек, қазір Қазақстанда қауіпсіздік талаптарына сәйкес келмейтін бірде-бір көлік моделі шығарыла алмайды. Сондықтан өндірушілер “Доңғалақты көлік құралдарының қауіпсіздігі туралы” Кеден одағының техникалық регламентін толық сақтап келеді”, – делінген министрлік мәлімдемесінде.
Осы ретте Индустрия және инфрақұрылымдық даму министрлігі медиа-кеңістікте тексерілмеген дәйексіз ақпаратты таратуға сақ болуға шақырады. Себебі оған заң жүзінде тиісті жауапкершіліктің бар екенін ескертеді.
Еске сала кетсек, белгілі қоғам белсендісі Санжар Боқаев Қазақстан үкіметінің елімізге ABS жүйесі, қауіпсіздік жастықтары және SOS түймелері жоқ экологиялық класы төмен көліктерді кіргізуге рұқсат бергенін айтқан болатын. Ол үкіметтің бұл шешімін сынап, Премьер-министрдің бірінші орынбасары Роман Склярға өз ұсынысын айтқан еді.
