2022 жылдың қорытындысы бойынша Қазақстанға тікелей шетелдік инвестициялардың жалпы ағыны 28 млрд АҚШ долларын құрады, бұл 2021 жылдан 17,7%-ға артық (23,8 млрд доллар). Бұл көрсеткіш соңғы 10 жылдағы рекордтық көрсеткіштердің бірі (2012 жылы – 28,9 млрд доллар), деп хабарлайды kazbusiness.kz.
Шет мемлекеттер ішінде ең көп инвестиция келесі елдерден құйылған:
- Нидерландтан – 8,3 млрд доллар;
- АҚШ-тан – 5,1 млрд доллар;
- Швейцариядан – 2,8 млрд доллар;
- Бельгиядан – 1,6 млрд доллар;
- Ресейден – 1,5 млрд доллар;
- Оңтүстік Кореядан – 1,5 млрд доллар;
- Қытайдан – 1,4 млрд доллар;
- Франциядан – 770 млн доллар;
- Ұлыбританиядан – 661 млн доллар;
- Германиядан – 469,5 млн доллар көлемінде түсті.
Жеке салалар бойынша инвестициялардың ағыны тау-кен өндіру өнеркәсібіне – 12,1 млрд доллар (25%-ға өсу), өңдеу өнеркәсібіне – 5,6 млрд доллар (+2,7%), көтерме және бөлшек саудаға – 5,1 млрд доллар (+36%), кәсіби, ғылыми және техникалық қызметке – 1,2 млрд доллар (2,2 есе), көлік және қоймалау ісіне – 1,2 млрд доллар (+13,5%) тиесілі.
Сондай-ақ ең көп инвестиция тартқан өңірлердің тізімі мынандай:
- Атырау облысына – 8,3 млрд доллар (өсім 48,3%);
- Алматы қаласына – 7,6 млрд доллар (+10,9%);
- Астана қаласына – 2,2 млрд доллар (+107,2%);
- Шығыс Қазақстан облысына – 2,2 млрд доллар (+3,1%);
- Ақтөбе облысына – 1,2 млрд доллар (11,2%-ға төмендеу).
