Қонаев қаласының бас жоспары таныстырылды. Онда қаладағы кәсіпкерлік нысандарды көбейтуге аса мән берілген.
Бүгінгі таңда Қонаев қаласының аумағы 9 мың га құрайды. Жаңа жоспар бойынша қала шекарасы 19 мың га болады.
Демографиялық болжамға сәйкес, Қонаев қаласы халқының саны 2050 жылға қарай 200 мың адамға жетеді.
Негізгі әкімшілік ғимараттар Қонаев қаласының қазіргі шекара аумағында орналасады. «Жаңа Іле» алаңында әлеуметтік, тұрғын үй және мәдени нысандар салынады.
«Қапшағай су қоймасы мен Іле өзені су туризмін жедел дамытуға мүмкіндік береді. Болашақта сервисті халықаралық деңгейге жеткізіп, ірі жарыстар мен спорттық жиын өткізу жоспарлануда. Ойын бизнесі аймағы мәдени ойын-сауық нысандарымен біріктірілген жағдайда жетекші халықаралық туристік аймаққа айналады», – дейді бас жоспарды жасаушылар. Яғни, қаланың дамуындағы негізгі бағыттардың бірі – бизнес-нысандарды көбейту болмақ.
Сонымен қатар, бүгінде қалада 107 тұрғын үй, 5 мектеп пен 2 емхананың құрылысы басталған.
Алматы облысына жұмыс сапары барысында Ұлттық экономика министрі Әлібек Қуантыров қаланы дамытуға үкімет тарапынан көмек берілетінін және Қонаевқа келген инвесторларға жағдай жасалатынын айтты.
«Облыстың әлеуеті зор. Инвесторлардың қызығушылығын көріп отырмыз. Үкімет кейбір жобаларды жүзеге асыруға айрықша назар аударатын болады. Мысалы, қаланың жаңа бөлігінде инфрақұрылым салу, сондай-ақ ескі қаладағы тозған инфрақұрылымды жаңарту. Осы салада атқарылатын жұмыс көп. Қолдау көрсетіледі», – деді ҰЭМ басшысы.
