Қызылорда облысы кәсіпкерлер палатасының директоры Пірмұхаммед Сыздықовтың айтуынша, өңірде мемлекеттік кірістер органдарымен бюджетті толықтыру мақсатында кәсіпкерлік қызметіне жиі араласу фактілері орын алуда.
«Республика бойынша көрсеткіштерді қарап, жергілікті мемлекеттік кірістер органдары бюджетке салық пен тиісті төлемдердің түсуін арттыру жолы ретінде кәсіпкерлерге қолайлы жағдай жасауды емес, көбіне жазалау тәсілін қолданып жатқанын атап өткім келіп отыр. Бір ғана мысалы, мәмілелерді жарамсыз деп тану бағытындағы жұмыстар. Осы жылдың алты айында мемлекеттік кірістер органдары мәмілелерді жарамсыз деп тану жөнінде сотқа 127 өтініш берген. Әр іс бойынша сотқа кем дегенде 2-4 кәсіпкерден тартылып жатыр. Соттың тек бірінші сатысында қаралу мерзімі 3 айды құрайтынын ескерсек, апелляциялық, кассациялық сатыларын қоса есептегенде кәсіпкердің аталған дау үшін 3 айдан 1 жылға дейінгі уақыты кетеді», – деді шарада Пірмұхаммед Сыздықов.
Бүгінгі күні Қызылорда мемлекеттік кірістер органдарымен сотқа мәмілелерді жарамсыз деп тану туралы талап қою бойынша республика көлемінде Алматы, Астана қалаларынан кейін 3 орында тұр.
«Бірінші үштікте орналасқан облыстарда тіркелген орта және шағын бизнес субъектілерінің санына қарай талдау жасасақ, Қызылордамен салыстырғанда Алматы қаласындағы кәсіпкерлер саны 5 есе, Астанада 3 есе көп. Біздің өңірде әрбір 150-ші кәсіпкер мемлекеттік кірістер органдарымен сотта дауласып жүр деп айтуға негіз бар», – деді Палата директоры.
Кірістер органдарының берген мәліметіне сүйенсек, Қызылорда облысында соңғы 3 жыл көлемінде 1535 салық төлеуші тіркеу мекенжайын өзге өңірге ауыстырған.
Облыс прокуроры Нұрлан Бижанов көтерілген әр өтінішке қатысты тиісті сала басшыларына тапсырма берді. Сонымен бірге, жақын күндері прокуратураның Кәсіпкерлер палатасымен бірге барлық ауданда бизнес өкілдерімен кездесу ұйымдастыратынын жеткізді.
