Рудныйда зейнеткер әйел төсек жаймаларын бір-біріне байлап, төртінші қабаттан түспекші болды, деп хабарлайды kazbusiness.kz.
Зейнеткердің іс-әрекетін байқаған куәгерлер полицияға хабарласқан.
Оқиға орнына учаскелік полиция инспекторы Тілектес Әубәкіров жеткен. Ол дереу пәтерге көтерілгенмен, оның есігі жабық болыпты. Содан кейін полицей жоғарыдағы қабаттағы көршілерінің пәтеріне көтеріліп, зейнеткер әйелмен сөйлесе бастаған. Ол үйде жалғыз қалғанын, ұлының есікті сыртынан кілттеп, жұмысқа кеткенін айтқан. Зейнеткер далаға шыға алмағаннан кейін балкон арқылы түспекші болған.
«Мен зейнеткермен сөйлесіп жатқанда туыстарына қоңырау шала бастадым. Біраз уақыттан кейін оның жиені келді. Ол азаматта үйдің қосымша кілті болды», – дейді инспектор Әубәкіров.
Біршама уақыттан кейін зейнеткердің ұлы да келген. Ол таңертең анасын мазалағысы келмегендіктен, есікті сыртынан жауып кеткенін айтты.
Ер адам учаскелік полиция қызметкеріне уақытында көмек көрсеткені және ықтимал қайғылы жағдайдың салдарын болдырмағаны үшін алғыс білдірді.
