Бүгінде салық төлеушілерге арналған бірнеше мобильді қосымша бар. Соның ішінде «E-Salyq Azamat» мобильді қосымшасын жеке тұлғалар қолданады. Яғни 1,5 млн. азамат осы қосымшаны пайдалануда, деп жазады kazbusiness.kz Қаржы министрлігінің Мемлекеттік кірістер комитетіне сілтеме жасап.
Қосымша меншік салықтарын (мүлік, жер, көлік салықтары) ыңғайлы төлеу үшін әзірленген. «E-Salyq Azamat» көмегімен:
- жалпыға бірдей декларациялау шеңберінде 580 мыңға жуық декларация немесе 44%-і табыс етілді;
- 200 млн. теңгеден астам салықтар мен төлемдер төленді.
Мынадай пысықтаулар жоспарлануда:
- чектерді бермегені және банк картасын қабылдаудан бас тартқаны үшін шағым беру («Азаматтық бақылау – Чекті талап ет» акциясы);
- жеке шоттарды қарау;
- жолаушылардың кедендік декларациясын ұсыну және т.б.
«E-Salyq Вusiness» мобильді қосымшасы жеке кәсіпкерлер үшін әзірленген. Бүгінде 439 мың жеке кәсіпкер осы қосымшаны пайдалануда.
Қосымшада мынадай функционал жүзеге асырылған:
- ЖК ретінде тіркелудің жеңілдетілген тәртібі;
- салық режимін таңдау немесе өзгерту;
- БКМ қолданбай чек беру және фискалдық деректер операторларының қызметтеріне ақы төлеу;
- әр түрлі анықтамалар алу.
Мынадай пысықтаулар жоспарлануда:
- жеңілдетілген декларацияны (910-нысан) алдын ала толтыру сервисін құру;
- такси мен жеткізу қызметтері бойынша интернет-платформалармен интеграциялау.
