Сарыағашта 5 жасар қыз айуандықпен өлім құшып, жерге тапсырылды. Құзырлы органдар сәбиді өлтірген жауыздың кім екенін анықтады, деп хабарлайды kazbusines.kz
Үйінен ойнауға шығып кеткен бүлдіршіннің денесі сол ауыл тұрғынының үйінен табылған. Денесінде көптеген пышақ жарақаты болған.
Ауыл тұрғындары қылмыскерді өздері жазалауға тырысты. Тәртіп сақшыларынан күдіктіні беруді сұраған. Алайда полицейлер 48 жастағы тұрғынды бөлімшеге алып кетіп үлгерді.
Құзырлы органдар айтуынша, күдікті екі ай бұрын ауылдасын балтамен ұрғаны үшін сотталған
Ол 2006 жылы кісі өлтіргені үшін 10 жылға бас бостандығынан айырылып, 2016 жылы босатылған.
Биылғы жылдың мамыр айында ауылдасымен ішімдік ішіп, ауызша жанжалдан кейін оны тұрмыстық балтамен ұрған.
Сотта ол кінәсін толық мойындап, жасаған ісіне өкінетінін білдірген. Жәбірленушінің өзі де оны кешіріп, жеңіл жаза тағайындауды сұраған. Содан соң сот ҚК 106-бабының 1-бөлігі бойынша кінәлі деп тауып, 3 жылға бас бостандығын шектеген.
Көп ұзамай күдікті осындай әрекетке барып отыр…
Бүгін ауылдастары қыршыннан қиылған бүлдіршінді жер қойнына тапсырды.
