Алматы облысының Қарасай ауданында орналасқан Шамалған бекетіндегі теміржол өткеліне “Сергек” камералары қойылды, деп хабарлайды kazbusiness.kz.
Бұл бастама облыс прокуратурасы мен полиция департаментінің бірлескен «Жол қозғалысының қауіпсіздігі» жобасы бойынша іске асырылды.
“Бір айда мобильдік топтармен жол қозғалысының қауіпсіздігін қамтамасыз ету саласында 158 бұзушылықтар анықталды, олардың 39 жойылды. Мысалы, Қарасай ауданы Шамалған теміржол өткелінде «Сергек» аппараттық-бағдарламалық кешендер орнатылған, делінген прокуратураның баспасөз-хабарламасында.
Естеріңізге сала кетсек, осыдан бірер жыл бұрын дәл осы теміржол өткелінде пойыз бен автобус соқтығысқан болатын. Салдарынан қоғамдық көлік жүргізушісі мерт болып, бірнеше адам жарақат алған.
Сонымен қатар, Алматы облысының прокуратурасы берген мәлімет бойынша, аталған жоба аясында Қарасай ауданына қарасты «Алматы-Жандосов» жолында Қаскелең қаласының бұрылысында бағдаршам орнатылды.
Әкімшілік полициямен Талғар ауданының тұрғын үй-коммуналдық шаруашылық бөліміне жаяу жүргіншілер өткелі және басқа да шектеуші жол белгілерінің жоқтығы фактілері бойынша ұйғарымдар енгізілді.
Райымбек және Жамбыл аудандарының мобильдік топтарымен малды сәуле шағылыстыратын таспамен қамсыздандыру бойынша жұмыс атқарылды, бұл жүргізушілерге түнгі уақытта ЖКО алдын алу бойынша шараларды уақтылы қолдануға мүмкіндік береді.
Жоба шеңберінде жол полициясы және көліктік бақылау инспекциясымен бірлесіп 32 рейдтік іс-шаралар жүзеге асырылды, нәтижелері бойынша 384 тұлға әкімшілік жауапкершілікке тартылған, соның ішінде 32 көлік құралын масаң күйде жүргізу үшін жазаланды. Бұл бағытта жұмыс жалғасуда.
