Шағын және орта бизнес субъектілерін тексеруге мораторий 2024 жылдың 1 қаңтарына дейін ұзартылады деп жоспарлануда. Ұлттық экономика министрлігі жарлықтың тиісті жобасын egov.kz порталында жариялады.
Ұлттық экономика министрлігі президент жарлығына толықтырулар әзірлеп жатыр. Жеке тексерулерді қоспағанда мемлекеттік органдардың 2023 жылдан 24 жылғы 1 қаңтарға дейін жоспардан тыс тексерулер тағайындау мүмкіндігін алып тастау көзделіп отыр. Бірақ заңнаманы елемей, адам өмірі мен денсаулығына зиян келтіріп, қоршаған ортаға қауіп төндірсе әрі тұтынушылардан арыз-шағым түссе арнайы органдар тексеріс жүргізуге құқылы.
Айта кетейік, мораторийдің ұзартылуы бизнес мүлдем тексерілмейді дегенді білдірмейді.
«Орталық мемлекеттік және жергілікті атқарушы органдар шағын кәсіпкерлікке, оның ішінде микрокәсіпкерлік субъектілеріне қатысты мемлекеттік органдардың бастамасы бойынша жүргізілетін мемлекеттік бақылау мен қадағалауды 2023 жылғы 1 қаңтардан бастап 2024 жылғы 1 қаңтарға дейін тоқтатсын», – деп жазылған ұсынылған жаңа редакцияда.
Құжат жобасын жария түрде талқылау 11 тамызға дейін жалғасады.
Еске сала кетейік, 2019 жылғы желтоқсан айында Президент 2023 жылға дейін шағын кәсіпкерлікті тексеруге мораторий енгізу туралы Жарлыққа қол қойды.
